Зеленский Ўзбекистонга бўлган таҳдид ҳақида гапирди

Россия Украина билан чекланмайди, унинг кейинги мақсади яна бир қатор давлатлар, жумладан Ўзбекистон бўлиши мумкин. Бу ҳақда Украина президенти Владимир Зеленский Вилнюсда Литва президенти билан бўлиб ўтган матбуот анжуманида маълум қилди, деб ёзади “Gazeta.ua”.

“У (Путин - таҳр.) тўхтамайди. У бизни бутунлай босиб олмоқчи. Баъзида ҳамкорларнинг Украинага молиявий ва ҳарбий ёрдам кўрсатишдаги иккиланишлари Россия Федерациясига куч қўшади”, — деди Зеленский.

“Кейинги ўринларда Литва, Латвия, Эстония ва Молдова бўлиши мумкин. Ва агар биз муваффақиятсиз бўлсак, бу ҳақиқатдир. Яқинда Финляндия ҳақида гапира бошлашганини эшитдик, Ўзбекистон мустақиллиги ва бошқаларни гапиришди”, — деди президент.

Эслатиб ўтамиз, декабрда россиялик Захар Прилепин Ўзбекистон борасида кескин фикр билдирган ва норозиликларга сабаб бўлганди.

Ўз ўрнида Британия Украинага учувчисиз самолётлар сотиб олиш учун маблағни ошириши маълум бўлди.

Буюк Британия бош вазири Риши Сунак жума куни Киевга сафар қилиб, Украинага янги ҳарбий дронларни, жумладан кузатувчи, узоқ масофали зарба берувчи бомбардимончи самолёт ва денгиз учувчисиз қурилмаларини харид қилишда ёрдам бериш учун ҳарбий маблағ кўпайишини эълон қилди, деб хабар беради Reuters ахборот агентлиги.

Лондон Россия босқинидан бери Киевнинг яқин тарафдорларидан бири бўлиб келган ва Сунак Британия келаси молиявий йилда ўз ёрдамини 2,5 миллиард фунт стерлингга (3,19 миллиард доллар) оширишини айтди, бу аввалги икки йилга нисбатан 200 миллион фунт стерлингга ошади.

Британия Украинага ҳар қандай давлатдан энг йирик дронларни етказиб беришини айтди, уларнинг аксарияти Британияда ишлаб чиқарилиши кутилмоқда.

“Мудофаа вазирлиги халқаро ҳамкорлар билан Украина мудофааси учун ажратилган учувчисиз самолётлар сонини сезиларли даражада ошириш бўйича ишлайди”, — дейилади ҳукумат баёнотида.

Сунак идорасининг маълум қилишича, "Катта еттилик" гуруҳининг Украинага икки томонлама хавфсизлик кафолатларини тақдим этиш бўйича келишувидан сўнг, Буюк Британия ва Украина ўртасида Хавфсизлик соҳасида ҳамкорлик бўйича тарихий келишув имзоланади.