Зойир Мирзаев бюджетдан 7 млрд. сўм ажратди
Аввалроқ вилоят кенгаши қарори билан ичимлик суви нархлари икки баробарга оширилганди.
Тошкент вилояти ҳокими Зойир Мирзаев тасдиқлаган қарорга асосан бюджетдан қўшимча равишда 7 млрд. сўм турли тадбирлар учун ажратилади. Бу ҳақда Халқ депутатлари Тошкент вилояти кенгаши қарорида айтилади.
Қарор маҳаллий бюджетнинг қўшимча маблағларидан фойдаланиш чора-тадбирларига бағишланади.
Жумладан, шаҳар ва туманларида "Кексалар маслаҳати" гуруҳи раҳбарларини рағбатлантириш учун 2029,5 миллион сўм маблағ ажратилади.
Шунингдек, Тошкент вилояти йўл инфратузилмасини бош режасини ишлаб чиқиш 3,6 млрд. сўм ажратилиши белгиланган.
Ободонлаштириш ходимлари учун иш қуролларига 800 миллион сўм маблағ сарфланиши кўзда тутилган. Жами мақсадлар учун сарфланаётган пуллар 7 млрд. сўмдан ошади.
Эслатиб ўтамиз, аввалроқ вилоят кенгаши қарори билан ичимлик суви нархлари икки баробарга ошиши белгиланганди.
