Нурафшонда Янги йил арчаси учун 700 миллион сўм сарфланади

Тошкент вилояти маркази Нурафшон шаҳрида Янги йил арчасини ўрнатиш ва безатиш харажатлари учун 700 миллион сўм ажратилади.

Бу бўйича вилоят ҳокими Зойир Мирзаевнинг фармойиши эълон қилинди.

Маблағ вилоят маҳаллий бюджетининг 2023 йил 3-чорак якуни билан шаклланган даромадлар режасининг орттириб бажарилган қисмидан тақдим этилади. Пул "Тошкент вилояти бизнес марказларини қуриш дирекцияси" ДУК ҳисобига ўтказиб берилиши кўзда тутилган.

Зойир Мирзаев кеча, 18 декабр куни Ёшлар иттифоқи вилоят кенгаши биносининг боғини ободонлаштириш ва кўкаламзорлаштириш учун 550 миллион сўм ажратганди.