Қатар компанияси Ўзбекистонда 4 та йирик лойиҳани молиялаштирмоқда

Қатарнинг Nebras Power компанияси Ўзбекистоннинг 4 та ҳудудида йирик энергетик лойиҳаларни амалга оширмоқда.

Шавкат Мирзиёев бугун, 1 октябр куни компания бошқаруви раиси Муҳаммад ал-Ҳажрий билан учрашган. Учрашувда энергетика, муқобил энергетикада янги лойиҳаларни илгари суриш бўйича ҳамкорлик масаласи кўриб чиқилган.

Хусусан:

• Сирдарё вилоятида буғ-газ технологиялари асосида қуввати 1,6 ГВт бўлган замонавий электр станцияси қурилиши бошланган;
• Сурхондарё вилоятида иссиқлик электр станциясини барпо этиш лойиҳаси якунланмоқда;
• Тошкент вилоятида 600 МВт қувватли энергия сақлаш тизимлари яратилади;
• Қорақалпоғистонда 1 ГВт қувватли шамол электр станцияси ишга туширилади.

Музокарада узоқ муддатли шериклик дастурини қабул қилиш, энг аввало “яшил” энергетикага доир истиқболли лойиҳаларни киритиш бўйича келишувга эришилган.

Маълумот учун, Nebras Power – Қатарнинг етакчи энергетика корпорацияси бўлиб, ўндан зиёд мамлакатда йирик лойиҳаларни амалга оширган.