Тошкент халқаро аэропортида чироқ ўчиб қолди
Шунингдек, маҳаллий авиақатновлар ва учиб келиш терминаллари зудлик билан захира манбаларига ўтказилган.
Тошкент халқаро аэропортида 27 август куни Қўйлиқ подстанциясида рўй берган авария туфайли электр таъминотида узилиш юз берди. Бу ҳақда Uzbekistan Airports маълумот берди.
Бир неча сония ичида захира манбалардан парвозларни таъминловчи объектлар: учиш-қўниш йўлаклари, ҳаво ҳаракатини бошқариш тизимлари, радионавигация ускуналари қуввати тикланди. Шу туфайли пойтахт аэропортида рейслар кечиктирилмади, дейилади хабарда.
Шунингдек, маҳаллий авиақатновлар ва учиб келиш терминаллари зудлик билан захира манбаларига ўтказилди. 15 дақиқа ичида, соат 22:24 да халқаро авиақатновлар терминалининг жўнаб кетиш залида ҳам электр таъминоти тикланди.
Соат 22:40да Қўйлиқ подстансиясида юз берган авария бартараф этилиб, пойтахт аэропортида электр таъминоти тўлиқ тикланган.
Эслатиб ўтамиз, 27 август куни Ўзбекистон бўйлаб ёғингарчиликлар ва чақмоқ ҳодисалари кузатилди, бу электр энергиясидаги узилишларга сабаб бўлган.
