Ар-Риёд аэропортига ҳужумда икки ўзбекистонлик жароҳат олди
Ҳодиса вақтида аэропорт ҳудудида бўлган яна 20 га яқин Ўзбекистон фуқароси жабрланмаган.
10 октябрь куни Ар-Риёд халқаро аэропорти 3-терминалига баллистик ракета ҳужуми оқибатида Ўзбекистоннинг икки фуқароси енгил жароҳат олди.
Бу ҳақда Ўзбекистон ТИВ матбуот котиби Омонулла Файзиев маълум қилди.
1977 ва 1997 йилларда туғилган фуқароларга биринчи тиббий ёрдам кўрсатилиб, сўнг Diriyah Hospital шифохонасига етказилган. Тиббий текширув ва зарур муолажалардан сўнг иккала бемор ҳам шифохонадан жавоб берилган.
Дастлабки маълумотларга кўра, ҳодиса вақтида аэропорт ҳудудида бўлган яна 20 га яқин Ўзбекистон фуқароси жабрланмаган.
"Ўзбекистоннинг Ар-Риёддаги элчихонаси Саудия Арабистонининг тегишли органлари билан биргаликда вазият ривожини кузатишда давом этмоқда, фуқароларимиз билан доимий алоқада бўлиб, уларга зарур консуллик-ҳуқуқий ёрдам кўрсатмоқда", — деди Омонулла Файзиев.
Эслатиб ўтамиз, 10 октябр куни Саудия Арабистонининг Ар-Риёд халқаро аэропортига йирик ҳужум қилинди.
Дастлабки хабарларга кўра 12 киши ҳалок бўлган, 300 дан ортиқ одам жароҳатланган.
Ўзбекистон Ташқи ишлар вазирлиги ҳужумни қатъий қоралаб, томонларни вазминликка ва кескинликни кучайтирмасликка чақирди.
