Эрдўғон Ғарбга қаршилик қилишни тўхтатди

НAТО бош котиби Йенс Столтенберг Туркия президенти Ражаб Тоййиб Эрдўғон Швециянинг НAТОга қабул қилиниши ҳақидаги протоколни ратификация қилиш учун парламентга тақдим этишга рози бўлганини маълум қилди.

Бу ҳақда у Швеция бош вазири Улф Кристерссон билан учрашувда маълум қилган.

“Европатлантика ҳудудида жиловлаш ва мудофаа муҳимлигини инобатга олган ҳолда, турк томони ратификацияни таъминлаш учун ассамблея билан яқиндан ҳамкорлик қилади”, — дейилади Столтенберг баёнотида.

Эрдўғон Швециянинг НAТОга киришини бир йил давомида тўсиб қўйди ва Туркиянинг Европа Иттифоқига кириши бўйича аниқ иш қилинмагунча бу ишга рози бўлмаслигини маълум қилганди.

Швецияда Қуръони каримнинг ёқилиши каби можаролар икки давлат ўртасидаги муносабатларни ёмонлаштириб юборганди.

Эслатиб ўтамиз, Россиянинг Украинага кенг миқёсли ҳужуми ортидан Швеция ва Финляндия НАТОга киришга қарор қилди.