ЖССТ: экологик муаммолар Европа ва Марказий Осиёда миллионлаб ўлимларга сабаб бўлмоқда
Шунингдек, 77 миллиондан ошиқ киши тоза ичимлик суви масаласида қийналмоқда.
Экологик муаммолар Европа ва Марказий Осиёда жойлашган 53 давлат аҳолисининг саломатлигига путур етказмоқда. Бу ҳақда ЖССТ ҳисоботида айтилади.
Ҳисоботда келтирилишича, бюрога аъзо 53 давлатда (жумладан, Марказий Осиё мамлакатларида) қайд этилаётган барча касалликларнинг қарийб 15 фоизи ушбу омил оқибатида пайдо бўляпти.
Бундан ташқари, Буюк Британиядан Хитой чегараларигача қамраб олган мазкур ҳудудда экологик муаммолар туфайли йилига 1,4 миллион инсон ҳаётдан кўз юммоқда.
Уларнинг 570 минг нафарга яқини атмосфера ифлосланиши оқибатида келиб чиқаётган хасталиклар қурбонларидир.
Қолаверса, биргина 2022 йилда Европа минтақасида кузатилган аномал иссиқ ҳарорат камида 20 минг кишининг ўлимига сабаб бўлди.
Шунингдек, 77 миллиондан ошиқ киши тоза ичимлик суви масаласида қийналмоқда.
Аввалроқ Марказий Осиёда сув инқирози бошлангани хабар берилганди. Мутахассисларнинг огоҳлантиришича, агар ҳозирги тенденциялар давом этса, қурғоқчилик келишмовчиликлар ва катта миграция оқимига олиб келиши мумкин.
