АҚШнинг энг катта душмани қайси давлат экани айтилди
Сиёсатчининг сўзларига кўра, Вашингтон тинчликни ҳар қандай йўл билан, жумладан, бутун дунё бўйлаб иттифоқчилари ёрдамида ҳам сақлаши керак.
AҚШнинг БМТдаги собиқ вакили, Республикачилар партиясидан президентликка номзод Никки Хейлининг сўзларига кўра, Хитой АҚШ учун энг катта хавф саналади.
Хитой ҳукумати ўз халқини Тайванга қарши урушга тайёрламоқда, дея Хейлининг сўзларини келтиради Fox News. Сиёсатчининг сўзларига кўра, Вашингтон тинчликни ҳар қандай йўл билан, жумладан, бутун дунё бўйлаб иттифоқчилари ёрдамида ҳам сақлаши керак.
“Хитой шунчаки “рақобатчи” эмас. Коммунистик Хитой душман. Бу Иккинчи жаҳон урушидан бери биз дуч келган энг хавфли ташқи таҳдид.
Коммунистик партия йилига 600 миллиард долларлик инновацияларимизни ўғирламоқда. У Aмериканинг қудратига путур етказиш учун Aмерика тадбиркорлигидан фойдаланмоқда. Ва президент (AҚШ Жо Байден) бунга йўл қўйиб бермоқда ”, деди Хейли.
Унинг қўшимча қилишича, AҚШ миллий хавфсизликка жиддий хавф туғдириши сабабли “Хитой таҳдиди”га ҳам иқтисодий, ҳам ҳарбий жиҳатдан жавоб бериши керак.
"Хитой бизнинг ватанимизга ўзининг шахсий ўйин майдончаси сифатида қарайди", дея хулоса қилди AҚШ президентлигига номзод.
Эслатиб ўтамиз, AҚШ-Хитой муносабатлари ҳатто Қўшма Штатларнинг 45-президенти Доналд Трамп даврида ҳам ёмонлашди, хусусан, у Хитой товарларига янги божлар жорий қилиш орқали Хитойга қарши "иқтисодий уруш" бошлади. Байден маъмурияти ҳокимиятга келганидан бери дипломатик муносабатларни яхшилашга уринишларига қарамай, Вашингтоннинг Пекинга муносабати деярли ўзгармади.
