Тошкент ҳокимияти трансформаторлар эскирганини тан олди
Бугунги кунда Тошкент шаҳрининг энергия таъминоти тизимига 152 та трансформатордан иборат 82 та подстанция киради.
Тошкент шаҳар ҳокимлиги эълон қилган ҳисоботда пойтахтда фойдаланилаётган кўплаб трансформаторлар эскиргани айтиб ўтилди.
Жумладан, Тошкент шаҳридаги электр узатиш тармоқларининг қарийб чорак қисми ва юқори кучланишли подстанциялардаги трансформаторларнинг 37 фоиздан ортиғи 40 йилдан зиёд вақтдан буён ишлаб келмоқда.
Бугунги кунда Тошкент шаҳрининг энергия таъминоти тизимига 152 та трансформатордан иборат 82 та подстанция киради.
Подстанциялардаги 56 та трансформатор ва 1 883 км узунликдаги электр узатиш линиялари 40 йилдан ортиқ вақт давомида ишлаб турибди.
Подстанциялардаги трансформаторларнинг 36 фоизи ҳамда электр узатиш тармоқларининг 24 фоизи 25 йилдан 40 йилгача бўлган даврда эксплуатация қилинмоқда, дейилади ҳокимлик эълон қилган маълумотда.
Энергетика таъминоти нисбатан барқарор кўриладиган Тошкент ҳам сўнгги йилларда бу муаммо билан тўқнашмоқда. Жумладан, 2023 йил январ ойида кузатилган аномал совуқ пойтахт энерготизимини карахт қилиб қўйганди.
Ҳатто, президент Шавкат Мирзиёев собиқ ҳоким Жаҳонгир Ортиқхўжаевни шу муаммолар ортидан ишдан олганди.
Лекин электр узилишлар фақат қишга хос бўлмай қолди. Давом этаётган июнь ойида ҳам электр узилишлари давом этмоқда.
