Нью-Йоркда террорчилик содир этган Сайфулло Соиповга суд ҳукми ўқилди
Қилмишидан пушаймон бўлмаган ва сурбет экстремист, Ўзбекистон фуқароси бўлмиш Сайфулло Соиповга 10 та умрбод қамоқ жазоси тайинланди ва қўшимча 260 йилга озодликдан маҳрум этилди.
У 2017 йил 31 октябрда ўз юк машинасини Манхэттендаги велосипед йўлакчасида кетаётган одамлар устига ҳайдаб, 8 кишининг ўлимига сабаб бўлган эди. АҚШ округ судьяси Вернон С. Бродерикнинг айтишича, у террорчини “шафқатсиз ва қўрқоқларча” жинояти шундай жазога ҳукм қилган.
Ҳукмни эълон қилган судья бу террорчиликнинг ўта жиддийлигини таъкидлаган, чунки Сайфулло Соипов бу қилмишини “Ислом давлати” террорчилик гуруҳи номидан амалга оширган.
Умрбод қамоқ жазоси берилганининг сабаби шундаки, март ойида бўлиб ўтган судда маслаҳат кенгаши ўлим жазосига қарши чиққан эди. Лекин прокуратура судья Бродерикдан Соипов учун 8 карра узлуксиз умрбод қамоқ жазоси ҳамда бир вақтнинг ўзида 2 та умрбод қамоқ жазоси сўраган.
Улар, шунингдек, бошқа террорчиларга ҳам ибрат бўлиши учун яна 260 йилга озодликдан маҳрум этишни қўшишни ҳам сўраган.
Судья Бродерик, шунингдек, Соиповнинг ўз қилмишидан пушаймон эмаслигини ҳам қайд этган. Соиповга судда сўз берилганида у жабрланувчилар ва уларнинг суд залида ўтирган оила аъзоларининг кўз ёшлари жуда борса, битта дастрўмолга жо бўлишини, лекин бутун дунёда ноҳақ ўлдирилган мусулмонларнинг кўз ёши ва қони суд залини тўлдирган бўларди, деган.
Ўзбекистон фуқароси, муқаддам Нью-Жерсида муқим яшаган 35 ёшли Сайфулло Соипов содир этган террорчилик оқибатида аргентиналик 5 нафар сайёҳ, икки америкалик ва бир нафар белгиялик аёл ҳалок бўлган, яна 18 киши турли даражада жароҳат олган.
Соипов юк машинаси билан йўловчиларни босиб ўлдирганидан кейин машиндан тушиб, пейнтбол ҳамда пневматик қуролини ҳавода силкитиб, “Аллоҳу акбар” деб бақирганида полиция томонидан отиб ташланган аммо тирик қолган.
Прокурорларнинг сўзларига қараганда, Соипов ўзини сўроқ қилаётганлардан палатаси деворига “Ислом давлати” террорчилик гуруҳининг байроғини осиб қўйишни илтимос қилган.
Судда Соиповниншг оиласи ўлим жазоси ўрнига умрбод қамоқ жазоси беришларини илтимос қилган. Унинг вақти келиб қилмишларидан пушаймон бўлиши ва кечирим сўраши учун имконият беришларини илтимос қилган.
Собиқ юк машинаси ҳайдовчиси Сайфулла Соипов 2010 йилда Ўзбекистондан АҚШга қонуний йўл билан келган бўлиб, Оҳайо ва Флоридада яшаган.
Сайфулло Соипов умрининг қолган қисмини Колорадо штатидаги максимал даражада қатъий режимдаги АDX Florence федерал қамоқхонасида ўтказади. 2013 йил апрелида Бостон марафонида портлашлар уюштиришда айбланиб, ўлимга ҳукм қилинган Жоҳар Сарнаев ҳам шу қамоқхонада сақланмоқда.
