Тошкентга олиб келинадиган 1000 та автобус нимани ҳисобига молиялаштирилади?

АОКАда ўтказилган брифингда "Тошшаҳартрансхизмат"АЖ ахборот хизмати раҳбари Муслима Обидова автобус саройларининг ҳайдовчилар билан таъминланганлик даражаси, уларга қўйилаётган талаблар ва яратилаётган шароитлар ҳақида маълумот берди. Маълум қилинишича, жорий йилда 420 та автобус ва электробуслар харид қилиниб, қатновга қўйилган. Автобуслар ҳаракати ва тўловлар тизими рақамлаштирилган. Таъмирталаб автобусларни таъмилаш, эҳтиёт қисмлар ва мойлаш материалларини таъмирлаш учун Тошкент шаҳар ҳокимлиги томонидан 5,0 млрд сўм маблағ ажратилган. 21 декабрь маълумотига кўра, йўловчилар сони ва тушумлар мос равишда 570 130 нафар ҳамда 629,2 млн сўмни ташкил этди. Бугунги кунда “Тошшаҳартрансхизмат” АЖ тизимида 148 та йўналиш мавжуд бўлиб, йўловчилар оқимининг кўпайиш прогнозидан келиб чиқиб, жамоат транспортининг 167 та йўналишдан иборат янги тармоғи шакллантирилди. Бу йўналишларни таъминлаш ва Тошкент шаҳрида жамоат транспортига бўлган талабни тўлиқ қондириш учун яна 1000 та катта сиғимли автобус зарур. Бу орқали автобусларнинг оралиқ интервали 7-10 дақиқагача қисқартирилади. Таъкидланишича, айни пайтда Транспорт вазирлиги ва Инвеститциялар ва ташқи савдо вазирлиги ҳамкорликда Тошкент шаҳар жамоат транспортига қўшимча 1000 та катта сиғимли автобусларни олиб келиш учун молиялаштириш манбасига аниқлик киритилмоқда.