Исроил Ғазони босиб олиш бўйича қарорни маъқуллади
Салкам икки йиллик қонли уруш ва ўн минглаб қурбонлардан сўнг яҳудий давлати Фаластин ҳудудини оккупация қилмоқчи.
Исроил Вазирлар Маҳкамаси Бош вазир Бенямин Нетаняхунинг Ғазо шаҳри устидан назорат ўрнатиш қарорини маъқуллади. Бу Нетаняху бир кун аввал эълон қилган бутун анклавни қайта эгаллаш режасининг биринчи босқичи бўлиши кутилмоқда.
Вазирлар Маҳкамаси йиғилиши олдидан Исроил бош вазири Fox News телеканалига берган интервьюсида Ғазо секторини тўлиқ назоратга олиш ниятида эканлигини, аммо бу доимий эмаслигини айтган.
Гап нима ҳақида?
2023 йил 7 октябрда қонли уруш бошлангач деярли бутун Ғазо сектори вайронага айланди. ҲАМАСни йўқ қилиш баҳонасида олиб борилган урушда 55 мингдан ошиқ тинч аҳоли ҳалок бўлди. Анклавда очлик бошланиб, ёш болалар вафот эта бошлади.
Исроил армияси аллақачон Ғазонинг 75 фоизини назорат қилмоқда. Исроилда кўпчилик янги режа ҲАМАСни тўлиқ мағлуб этиш бўйича белгиланган мақсадга етказа олмайди ва омон қолган гаровга олинганларни хавф остига қўяди, деб ҳисоблайди. Times of Israel нашрига кўра, Ғазо шаҳридаги операция ҳозирда 800 мингга яқин аҳоли истиқомат қилаётган ҳудудни оммавий эвакуация қилишни талаб қилиши мумкин.
“Исроил армияси жанговар ҳудудлардан ташқарида тинч аҳолига гуманитар ёрдам етказиш билан бирга Ғазо шаҳри устидан назорат ўрнатишга тайёр бўлади”, деди Нетаняху идораси ҳарбий Вазирлар Маҳкамаси йиғилиши якунлари бўйича баёнотда.
Шунингдек, у "урушни тугатиш" тамойилларини батафсил баён қилади:
-ҲАМАСни қуролсизлантириш;
-барча гаровга олинганларни, ҳам тирик, ҳам ўликларни қайтариш;
-Ғазо секторини демилитаризация қилиш;
Сектордаги хавфсизлик устидан Исроил назорати;
ҲАМАС ҳам, Фаластин маъмурияти ҳам бўлмаган муқобил фуқаролик ҳукуматининг мавжудлиги.
"Биз уни ўзимиз учун эгаллашни хоҳламаймиз. Биз хавфсизлик чегарасини хоҳлаймиз. Уни бизга таҳдид қилмасдан ва Ғазо аҳолисига яхши ҳаёт билан таъминлаб, тўғри бошқарадиган араб кучларига топширмоқчимиз. Бу ҲАМАС билан бўлиши мумкин эмас ", деди Нетаняху.
Нетаняхунинг Ғазони босиб олишга мойиллиги ҳафта давомида оммавий ахборот воситаларига аноним равишда маълумотлар сиздирилганидан далолат берди.
"Биз Ғазо секторини тўлиқ босиб олиш ва ҲАМАСни мағлуб этиш ниятидамиз", - дея юқори мартабали ҳукумат амалдорининг сўзларидан иқтибос келтирган маҳаллий журналистлар.
Шу билан бирга, ОАВ хабарларига кўра, Исроил армияси Бош штаб бошлиғи Эял Замир Ғазонинг доимий босиб олинишига қарши ва унинг Нетаняху билан бу ҳафтадаги учрашуви кескин муҳитда ўтган. ОАВнинг ёзишича, Замир ҳудудни тўлиқ босиб олиш Исроил армияси учун тузоқ бўлишини айтган.
Учрашувдан сўнг ҳукумат матбуот хизмати армия ҳукуматнинг ҳар қандай қарорини амалга оширишига ишонтирди. Исроил ҳозирда сектор ҳудудининг тўртдан уч қисмини назорат қилади. Истиснолар - шимолдаги Ғазо шаҳри ва марказда қочқинлар лагерлари жойлашган ҳудудлар. Исроил матбуотига кўра, Ғазонинг қолган қисмини босиб олиш беш ой давомида босқичма-босқич амалга оширилади.
Эслатиб ўтамиз, Ғазо сектори бўйича музокаралар ҳозирда боши берк кўчага кириб қолган. Ҳудуд чуқур гуманитар инқирозни бошдан кечирмоқда. Яқинда ҳудудда болалар очликдан ўлишни бошлагани хабар берилди. Халқаро ташкилотлар Исроилни блокада ва гуманитар ёрдамни тўсиб қўйишда айбламоқда.