Трамп Путинга 10 кун муҳлат берди
Бу кунлар ичида Россия Украинадаги урушни тўхтатиши керак.
АҚШ президенти Доналд Трамп Россияга Украинадаги можарога барҳам бериш учун 10 кун муҳлат берди.
Унга кўра, кун ҳисоби "бугундан" бошланади. Трампга кўра, Россия президенти Владимир Путин можаронинг давом этишидан манфаатдор.
"Кейин биз божлар ва ҳоказоларни жорий қиламиз... Ва улар Россияга қанчалик таъсир қилишини билмайман. Чунки у урушни давом эттиришни хоҳлаётгани аниқ", - деди Трамп самолёт бортида журналистларга. Аудио эшиттириш Оқ уй томонидан Youtube каналида олиб борилган.
АҚШ президентининг қўшимча қилишича, у товар бозорлари Россияга нисбатан мумкин бўлган чекловларга қандай муносабатда бўлишидан “хавотирда эмас”.
28 июль куни Доналд Трамп Россия ва Украина ўртасидаги келишувга эришиш учун аввалроқ берилган 50 кунлик муддатни қисқартирди. АҚШ президенти Истанбулдаги Россия-Украина музокараларида муваффақият қозонмаганидан норози эканини айтди. У Россия билан бизнес юритувчи давлатларга нисбатан санкциялар қўллаш билан таҳдид қилган.