Саид Абдулазиз Юсупов 10 йил муддатга қамалди
Суд уни Ўзбекистон Республикасининг конституциявий тузумига тажовуз қилиш (ЖК 159-моддаси 3-қисми “а” банди) ҳамда оғирлаштирувчи ҳолатларда туҳмат (ЖК 139-моддаси 2-қисми “а, г” бандлари) жиноятларини содир қилганликда айбли деб топди.

Саид Абдулазиз Юсуповга нисбатан суд ҳукми ўқилди. Бу ҳақда Kun.uz нашри хабар берди.
Маълум қилинишича, Саид Абдулазиз Юсупов 20 ноябрь куни ҳарбий суд ҳукми билан жиноий жазога тортилган. Суд уни Ўзбекистон Республикасининг конституциявий тузумига тажовуз қилиш (ЖК 159-моддаси 3-қисми “а” банди) ҳамда оғирлаштирувчи ҳолатларда туҳмат (ЖК 139-моддаси 2-қисми “а, г” бандлари) жиноятларини содир қилганликда айбли деб топди. Унга 10 йил муддатга озодликдан маҳрум қилиш жазоси тайинланган.
Саид Абдулазиз Юсупов муқаддам судланган. У 2019 йилнинг 10 майида фирибгарликда гумонланиб қўлга олинганди. Ўшанда унга ўзлаштириш ёки растрата йўли билан талон-торож қилиш, фирибгарлик ва пора бериш жиноятлари билан айбланган. У 2020 йилнинг 8 июль, чоршанба куни қамоқдан озод этилган.
Маълумот учун, Саид Абдулазиз Юсупов 1982 йилда Навоий вилоятида туғилган, миллати — ўзбек, Ўзбекистон фуқароси, маълумоти — олий, оилали, қўлга олингунга қадар Ўзбекистон мустақил босма оммавий ахборот воситалари ва ахборот агентликларини қўллаб-қувватлаш ва ривожлантириш жамоат фонди директори вазифасини бажарувчи бўлиб ишлаган.





