Энди уй учун тўланган пуллар тўғридан-тўғри қурувчига эмас, эскроу ҳисобига тушади
Қонунчилик палатаси депутатлари тегишли қонун лойиҳаси кўриб чиқиб, Сенатга юборди. Девелопер фақат Ягона информацион тизимда рўйхатдан ўтган, банк билан бош битим тузган ва лойиҳа декларациясини эълон қилган тақдирдагина аҳоли маблағларини жалб қила олади.
Қонунчилик палатасида "Кўп квартирали уйлар ва бошқа кўчмас мулк объектларини улуш киритиш асосида қуриш тўғрисида"ги қонун лойиҳаси кўриб чиқилиб, Сенатга юборилди.
Асосий янгиликлар ва ҳимоя механизмлари:
- улушдорлар маблағлари тўғридан-тўғри қурувчига эмас, банкдаги эскроу ҳисобига тушади ва уй фойдаланишга топширилгачгина қурувчига ўтказилади. Девелопер фақат Ягона информацион тизимда рўйхатдан ўтган, банк билан бош битим тузган ва лойиҳа декларациясини эълон қилган тақдирдагина аҳоли маблағларини жалб қила олади.
- Улушли иштирок этиш шартномаси нотариусда тасдиқланиб, давлат рўйхатидан ўтказилади. Бу уй-жойни такроран сотиш ва ноқонуний битимларнинг олдини олади.
- Қурувчи қонунга зид равишда пул жалб қилса, улушдор маблағни қайтаришни ва ундан фойдаланилгани учун фоиз тўланишини талаб қилиш ҳуқуқига эга бўлади.
- Зарур ҳолларда банк ёки қурувчини алмаштириш ҳамда молиялаштиришни узлуксиз давом эттириш механизмлари жорий этилмоқда.
- Лойиҳа ва қурувчи ҳақидаги барча маълумотлар Ягона информацион тизимга жойлаштирилади.
Қонун кучга кирганидан кейин қурилишига рухсатнома олинган объектларга нисбатан татбиқ этилиши белгиланди.
