Нурафшон шаҳрида “Келажак технологиялари маркази” ташкил этилади
Илмий тадқиқотлар ва саноат ўртасидаги ҳамкорликни кучайтириш учун келажак технологиялари бўйича тадқиқотчиларни саноат корхоналари билан боғлайдиган “Янги саноат” миллий платформаси ишлаб чиқилади.
Мамлакатимизда юқори технологияли саноатни ривожлантириш учун зарур пойдевор шаклланмоқда. Тўқимачилик, металлни қайта ишлаш, қурилиш ва бошқа соҳалар учун технологик ускуналар чиқарадиган ўнлаб корхоналар пайдо бўлди. Оҳангарон технопаркида микропроцессор модуллари ишлаб чиқарилмоқда, кореялик ҳамкорлар билан Тошкент шаҳрида роботлар ишлаб чиқариш лойиҳаси бошланган.
Бундай корхоналарни кўпайтириш орқали иқтисодиёт тармоқларини замонавий ускуналар, саноат роботлари ва электроника маҳсулотлари билан таъминлайдиган яхлит экотизимни шакллантириш мақсад қилинган.
Шу боис, Нурафшон шаҳрида “Келажак технологиялари маркази” ташкил этилади. Марказ корхоналарига IT-park резидентлари билан бир хил имтиёзлар берилади. Роботлар, электроника ва технологик ускуналар ишлаб чиқариш учун зарур хомашё ҳамда бутловчи қисмлар импорт божидан озод этилади. Ушбу йўналишдаги илмий ишланмалардан олинган даромадга солиқ солинмайди.
Илмий тадқиқотлар ва саноат ўртасидаги ҳамкорликни кучайтириш учун келажак технологиялари бўйича тадқиқотчиларни саноат корхоналари билан боғлайдиган “Янги саноат” миллий платформаси ишлаб чиқилади.
Ҳар бир ҳудудда 1 майга қадар биттадан тадқиқот ва ишланмалар (R&D) маркази ёки технопаркни янги саноат йўналишларига мослаштириб, маҳсулотларни синовдан ўтказиш майдончасини ташкил этиш вазифаси белгиланди. Улар йирик корхоналар ва кичик тадбиркорлар ўртасидаги кооперацияни мустаҳкамлайди.
Шунингдек, мутасаддиларга икки ҳафтада робототехника соҳасини ривожлантириш бўйича қарор лойиҳасини, 1 мартгача эса ускунасозлик ва электроника тармоқларини қўллаб-қувватлашнинг комплекс дастурини тайёрлаш топширилди.
Кейинги уч йилда электротехника ва унга боғлиқ янги саноат йўналишларида умумий қиймати 11 миллиард 600 миллион долларлик 164 та лойиҳани амалга ошириш режалаштирилган.
Тармоқ ортиқча олтита асосий йўналишда ривожлантирилади. Жумладан, кабель саноатида 2,5 миллиард долларлик 41 та, трансформаторлар ва насослар ишлаб чиқаришда 1,4 миллиард долларлик 29 та, саноат робототехникаси ва ускунасозликда 3 миллиард долларлик 45 та лойиҳа бажарилади.
Шунингдек, транспорт ва электромобиллар учун электротехника маҳсулотлари бўйича 650 миллион долларлик 9 та, электрон компонентлар ва микроэлектроника бўйича 3,5 миллиард долларлик 21 та, маиший техника соҳасида 600 миллион долларлик 19 та лойиҳа назарда тутилган.
Ҳар бир йўналишга масъул раҳбарлар ва асосий буюртмачилар бириктирилади. Уларга таянч инвесторларни жалб қилиш, илмий марказлар ва техника олийгоҳлари билан ҳамкорликни йўлга қўйиш топширилди.
