АҚШ вице-президенти Эрон билан урушни очиқчасига танқид қилди
Жей Ди Венс АҚШ президенти Доналд Трамп бошлаган Эрон билан урушни танқид қилди. Унинг фикрича сайловда республикачиларининг ютқазишига Эрон билан бўлаётган уруш сабаб бўлган.
АҚШ витсе-президенти Жей Ди Венс Доналд Трамп бошлаган урушни очиқчасига таниқ қилди. Бу ҳолат Республикачилар партиясининг Конгрессда бўлиб ўтган оралиқ сайловларида мағлубиятга учраганидан кейин содир бўлди. Бу ҳақда “The Washington Post” хабар қилди.
Нашрининг ёзишича, Венс мазкур баёнотни эълон қилишдан олдин мамлакат президенти билан маслаҳатлашмаган бўлиши мумкин. Витсе-президентнинг бу баёноти “Трампдан сиёсий жиҳатдан узоқлашишга ҳаракат қилаётгани ҳақидаги тахминларни келтириб чиқарди”, дея ёзади нашр.
Венс Х ижтимоий тармоқда қолдирган баёнотида Республикачилар партиясининг сайловдаги мағлубиятига Эрон билан боғлиқ оммабоп бўлмаган уруш сабаб бўлганини таъкидлади.
“Агар сиз бу уруш бунга арзирди, кейинги олти йил давомида Сенатдаги кўпчилик ўрнини йўқотиш ҳам шунга арзирди, деб ҳисобласангиз, марҳамат”, – деб ёзган Венс.
Бироқ Трамп Эрон билан урушни бошлаш тўғри қарор бўлганини таъкидлашда давом этган. 4-ноябрь куни журналистлар билан суҳбатда: “Эрон масаласида биз буни қилишимиз керак эди ва ҳозир ҳам шу ишни давом эттиряпмиз”, – деган у.
Шунингдек, Трамп ўша куни эрталаб Венс билан гаплашганини маълум қилган. Витсе-президентнинг баёноти ҳақидаги саволга жавоб берар экан, унинг позициясини тушунишини айтган ва: “Менимча, бу яхши бўлди”, дея муносабат билдирган. Трамп уруш оралиқ сайловларга таъсир қилишини билганини ҳам тан олган, бироқ ўз қарорларини ҳимоя қилган.
Қайд этилишича, АҚШнинг хориждаги ҳарбий аралашувларига нисбатан узоқ вақтдан бери эҳтиёткор позицияни қўллаб келган Венс Трамп Эрон билан урушни бошлаганидан кейин уни ҳимоя қилишда фаоллик кўрсатмаган. У ҳатто ҳарбий ҳаракатларни тугатишга қаратилган уринишларда ҳам иштирок этган, аммо бу ташаббус муваффақиятсиз якунланган.
Венс 2028 йилда бўлиб ўтадиган президентлик сайловларида Республикачилар партиясидан номзод сифатида кўрсатилиши мумкин бўлган сиёсатчилардан бири ҳисобланади.
Айрим таҳлилчилар фикрича, унинг урушни очиқ танқид қилиши ўзининг мустақил сиёсий позициясини шакллантириш ва маъмуриятнинг омма орасида қўллаб-қувватланмаётган қарорлари учун жавобгарликдан четда қолишга уриниш бўлиши мумкин. Бундай қарорлар қаторига мигрантларга қарши рейдлар ва савдо божлари ҳам киради.
Бироқ Трамп билан очиқ келишмовчиликка бориш Венс учун хавфли бўлиши мумкин. Чунки Президент ўз атрофидаги сиёсатчилардан анъанавий равишда садоқат талаб қилади.
Маълумот учун, 2028 йилги президентлик сайловларида иштирок этиши мумкин бўлган яна бир номзод сифатида АҚШ Давлат котиби Марко Рубио ҳам тилга олинмоқда.
Америка оммавий ахборот воситаларида унинг эҳтимолий истеъфоси ҳақида тахминлар пайдо бўлди. Бироқ Рубионинг ўзи бу хабарларни рад этди. У “The New York Times” нашрига берган интервьюсида ўз ишини яхши кўришини айтган, аммо президентлик сайловларида иштирок этиш эҳтимоли ҳақидаги саволларга ҳозирча аниқ жавоб бермаган.
