Эркинжон Турдимов бешта ректорни ишдан бўшатди – ОАВ
Жумладан, Ўзбекистон давлат жаҳон тиллари университети ректори Илҳомжон Тўхтасинов ва Самарқанд давлат чет тиллари институти ректори Баҳодир Ҳолиқов лавозимидан озод этилган.
Ўзбекистондаги олий таълим муассасаларидаги 5 ректор лавозимидан озод этилгани айтилмоқда. Бу ҳақда Qalampir нашри хабар берди.
Манбанинг билдиришича, бугун, 6 ноябрь куни Таълим ва илм-фан вазири Эркинжон Турдимов ўтказган йиғилишда Ўзбекистондаги 5 та ОТМ, жумладан, Ўзбекистон давлат жаҳон тиллари университети ректори Илҳомжон Тўхтасинов ва Самарқанд давлат чет тиллари институти ректори Баҳодир Ҳолиқов лавозимидан озод этилган.
Жаҳон тиллари университети ректорининг ишдан олиниши “Хавфсиз талаба” иловаси билан боғлиқ можаро туфайли юз бергани айтилмоқда.
Аввалроқ “Хавфсиз талаба” иловаси билан боғлиқ можаро ортидан Жаҳон тиллари университетнинг Таржимонлик факультети декани Улуғбек Йўлдошев ишдан олинганди.
Тарқалган видеоларда талабалардан “Хавфсиз талаба” иловасини ўрнатиш талаб қилинаётгани, айрим ҳолларда бунга рози бўлмаганлар дарсларга киритилмаётгани маълум қилинганди.
