"Турон" бекатидаги бахтсиз ҳодисада етказилган зарар миқдорини аниқлаш метрополитен зиммасига кирмайди — Йўлдош Юсупов
2021 йилда Транспорт вазири томонидан президентга "Буюк ипак йўли" бекатидан ТТЗ даҳасигача ягона ерўсти йўли ҳамда ерўсти ҳалқа метросининг иккинчи босқичини амалга ошириш режалари тақдим этилганди. Лойиҳа қурилиши 2026 йил охирида якунланиши керак эди. Аммо ҳозирда лойиҳа ҳам, қурилиш ҳам йўқ.
Жорий йилнинг июль ойида "Турон" бекати томи қулаб тушиб, икки одам жароҳатлангани ҳақида хабарлар тарқалган эди. Ҳолат бюджетга қанча зарар етказгани эса очиқланмаган эди.
Platina.uz метрополитен раҳбари ўринбосаридан етказилган зарар ҳақида сўради.
“Турон бекатидаги кўнгилсиз воқеа, яъни шифт қисми тушиб кетиши, бу энди қурувчилар масаласи, яъни ҳалқа йўлидаги ушбу масала қурувчи ва буюртмачи томонидан бугунги кунда ўрганилмоқда. Улар томонидан шу ҳисоб-китоблар, бюджетга етказилган зарар ёки бўлмасам нима сабабдан ушбу ҳолат юзага келганлиги ўрганилса, қўшимча ахборот беришади. Бу метрополитен, метрополитен ташиш билан шуғулланади.
Бугунги кунда шу линия бутунлай фойдаланишга қабул қилинса, кейинчалик сақлаш ва ундан фойдаланиш бизнинг мажбуриятимизга киради”, — деди метрополитен раҳбари трансформация ва молия масалалари бўйича ўринбосари Йўлдош Юсупов.
Шунингдек, 2021 йилнинг 15 ноябрида давлат раҳбарига Тошкент метрополитенининг "Буюк ипак йўли" бекатидан ТТЗ даҳасигача ерўсти йўли ҳамда ерўсти ҳалқа метросининг иккинчи босқичини амалга ошириш режалари тақдим этилган эди. 2025 йил майида эса президентга мазкур лойиҳа 2026 йил охиригача якунланиши кўзда тутилгани бўйича ахборот берилган.
Platina.uz мухбири Йўлдош Юсуповга шу ҳақида савол берганида у “лойиҳани қуриш билан метрополитен шуғулланмаслигини, метрополитен фақатгина ташиш билан шуғулланганлиги сабабли, уни қуриш, қачон бошланиши, лойиҳа-смета ҳужжатларини ишлаб чиқиш ва шунга ўхшаган ҳолатларни Транспорт вазирлиги тўғридан-тўғри ўзлари ишлаб чиқиб, оммага тақдим қилади”, деди у.
“Лойиҳа масаласи бўйича, Президентимизга қилинган лойиҳа масаласи бўйича, у бўйича Транспорт вазирлиги алоҳида ўзлари шуғулланишяпти”, — дея қўшимча қилди Юсупов.
Шундан сўнг, Platina.uz мазкур лойиҳа бўйича Транспорт вазири матбуот котиби Наврўз Ашурматов билан боғланди.
Ашурматовнинг айтишича, лойиҳани қуриш ҳали бошланмаган, чунки Юнусобод йўлидаги таъмирлаш ва ер усти метро бекатларини таъмирлашга вақт кетганлиги сабабли бу йил лойиҳани тугатиш имконсиз.
