"Табиий ҳолат" — метродаги "пробка"га изоҳ берилди
“Пахтакор” метро бекатида йўловчилар тирбандлиги юзага келди. Бекатга икки поезднинг бир вақтнинг ўзида келиши натижасида йўловчилар оқимининг вақтинча ортиши кузатилган.
Ижтимоий тармоқларда “Пахтакор” метро бекатида йўловчилар тирбандлиги юзага келгани ҳақида хабарлар тарқалмоқда. “Тошкент метрополитени” АЖ ҳолат юзасидан изоҳ берди.
Ҳолат жорий йилнинг 20 октябрь куни тахминан соат 17:43 да кузатилган. Бекатга икки поезднинг бир вақтнинг ўзида келиши натижасида йўловчилар оқимининг вақтинча ортиши кузатилган. Бундай ҳолат йўловчилар оқими юқори бўлган тиғиз вақтларда кузатиладиган, қисқа муддат давом этадиган табиий жараёнлардан бири бўлиб, бир неча дақиқа ичида йўловчилар оқими меъёрлашади.
Шу билан бирга, Тошкент метрополитенида кунлик йўловчилар оқими 1,2 миллион нафардан ортиб бораётганини инобатга олган ҳолда, йўловчиларга қулайлик яратиш ва бекатларда йўловчилар тўпланишини камайтириш мақсадида поездлар ҳаракати интервалларини қисқартириш чоралари кўрилмоқда.
Хусусан, поездлар ҳаракати интерваллари қуйидаги кўрсаткичларга етказилмоқда:
— Чилонзор йўналишида — 1,5–2 дақиқагача;
— Ўзбекистон йўналишида — 3 дақиқагача;
— Юнусобод йўналишида — 4 дақиқагача;
— Ер усти ҳалқа йўли йўналишида — 7–8 дақиқагача.
“Тошкент метрополитени” АЖ йўловчилар оқимини самарали бошқариш, поездлар ҳаракатининг барқарорлигини таъминлаш ҳамда йўловчиларга қулай ва хавфсиз транспорт хизматини кўрсатиш бўйича тегишли ишларни изчил амалга оширмоқда, дея таъкидланади хабарда.
