Самарқандда тириклайин кўмиб юборилган эркак комада ётиб вафот этди
Марҳум таниши билан ошхонадан чиқиб, уйига кетаётганида уларнинг йўлини оқ рангли Spark тўсган. Машинадан тушган шахслар унга ҳужум қилиб, бошига арматура билан урган.
Самарқанд вилояти Пайариқ туманида бир гуруҳ шахслар томонидан калтакланиб, тириклайин кўмиб юборилган 32 ёшли эркак қарийб бир ой комада ётиб, вафот этди. Бу ҳақда “Миллар” дастурида хабар берилди.
Маълум қилинишича, Наврўз маҳалласида яшаган 32 ёшли йигит таниши билан ошхонадан чиқиб, уйига кетаётганида уларнинг йўлини оқ рангли Spark тўсган. Машинадан тушган шахслар унга ҳужум қилиб, бошига арматура билан ура бошлаган.
Воқеа гувоҳининг айтишича, у ўртоғини ҳимоя қилишга ва ҳужум қилганларнинг қўлидаги арматурани олиб қўйишга уринган. Шу пайт қолганлар унга ҳам ташланиб, тошлар билан урган.
Марҳумнинг турмуш ўртоғининг таъкидлашича, эри таниб бўлмас даражада жароҳатланган ва 28 кун комада ётган.
Жанжалга нима сабаб бўлгани ҳозирча очиқланмаган. Марҳумнинг акаси ҳужум қилганларнинг барчасини ҳам яхши танимаслигини, улар билан оиласи ўртасида адоват бўлмаганини билдирган. Бироқ воқеадан икки кун олдин укаси улар билан жанжаллашиб, ёқалашганини кўрганлар борлигини айтган.
Ҳолат юзасидан дастлаб Жиноят кодексининг 104-моддаси 2-қисми билан жиноят иши қўзғатилган. Жабрланувчи вафот этгач, иш ушбу модданинг 3-қисми “д” бандига қайта малакаланган.
Айбланувчиларга нисбатан қамоққа олиш тарзидаги эҳтиёт чораси қўлланган. Ҳозирда Самарқанд вилояти ИИБ ҳузуридаги Тергов бошқармаси томонидан тергов ҳаракатлари олиб борилмоқда.
