"Ўзбекистонда яратилган" китоби тақдимоти ўтказилди
Мазкур нашр мамлакатимиз иқтисодиётининг турли йўналишларида фаолият юритаётган 30 нафар йирик компания асосчиси ва раҳбарининг ҳаётий тажрибаси, бошқарув фалсафаси ҳамда муваффақиятга эришиш йўлларини ўзида жамлаган.
ОАВ учун Контент тайёрлаш марказида журналист муаллифи Кирилл Альтман қаламига мансуб "Ўзбекистонда яратилган" ("Сделано в Узбекистане") номли янги китоб тақдимоти бўлиб ўтди.
Мазкур нашр мамлакатимиз иқтисодиётининг турли йўналишларида фаолият юритаётган 30 нафар йирик компания асосчиси ва раҳбарининг ҳаётий тажрибаси, бошқарув фалсафаси ҳамда муваффақиятга эришиш йўлларини ўзида жамлаган. Муаллиф бир йил давомида финтех, банк, саноат, чакана савдо, авиация, медиа ва хизмат кўрсатиш соҳаларида ўз брендини яратган етакчилар билан суҳбатлашган.
Китоб саҳифаларидан Зафар Ҳошимов ("Korzinka"), Улуғбек Рустамов ("CLICK"), Шуҳрат Худойқулов ("Uzbekistan Airways"), Ника Курдиани ("TBC Uzbekistan"), Иззат Шукуров ("Yandex Uzbekistan"), Мадина Самигжонова ("Safia") каби таниқли тадбиркорларнинг фикрлари, тажрибалари ва ҳаётий хулосалари ўрин олган.
Асар нафақат бизнес вакиллари, балки кенг китобхонлар аудиторияси учун ҳам мўлжалланган. Унда тадбиркорлик фаолиятини энди бошлаётган ёшлар учун амалий сабоқлар, тажрибали раҳбарлар учун эса жамоани ривожлантириш, стратегик фикрлаш ва ўзгаришларга мослашиш бўйича муҳим хулосалар мужассам. Муаллифнинг таъкидлашича, ҳақиқий тадбиркорлик фақат даромад ортидан қувиш эмас, балки одамларга ишонч, жамоа ва қадриятлар яратишдир.
Китоб ўзбек ва рус тилларида, алоҳида икки муқовага эга "тескари китоб" (flip-book) форматида "Ўзбекистон" нашриётида 1 500 нусхада чоп этилган. Тақдимот давомида муаллиф ва китоб қаҳрамонлари иштирокида очиқ мулоқот, ОАВ вакиллари учун савол-жавоб сессияси ҳамда дастхат улашиш маросими ташкил этилди.
