Исроилдаги сайловларда биронта партия ҳукмронлик учун етарли овоз тўплай олмади
Кнессетдаги 120 ўрин учун ўттиз етти партия кураш олиб борди. Мамлакат тарихида ҳеч бир сиёсий куч парламентда мутлақ кўпчиликни (камида 61 ўрин) қўлга киритмаган, шунинг учун барча ҳукуматлар коалицион ҳукуматлар бўлган.
Кнессет сайловларидан сўнг Исроилда янгиланган экзит-полл натижалари эълон қилинди.
Бу эса собиқ бош штаб бошлиғи Гади Эйзенкот бошчилигидаги мухолифат блоки энди олдинда эмаслигини, балки Беньямин Нетаньяху ва унинг иттифоқчилари билан тенглашиб қолганлигини кўрсатмоқда.
Иккала блок ҳам 51 тадан ўринга эга бўлиши тахмин қилинмоқда.
Дастлабки экзит-полл натижаларига кўра, собиқ бош штаб бошлиғи Гади Эйзенкот бошчилигидаги мухолифат блоки Кнессетда 52-53 ўринга, Нетаньяху ва унинг иттифоқчилари эса тахминан 50 та ўринга, жумладан, унинг Ликуд партияси учун 24-25 ўринга эга бўлади.
Бироқ, янги экзит-полл натижалари Нетаньяху ва Эйзенкот блоклари ўртасидаги тенгликни кўрсатмоқда.
Исроилнинг Kan 11 ва Channel 13 янгиликлар каналлари янгиланган экзит-полл натижаларини эълон қилишди ва иккита рақобатдош блокнинг ҳар бири 51 тадан ўринга эга бўлишини тахмин қилишди.
Channel 12 ҳам экзит-полл маълумотларини қайта кўриб чиқди. Энди, янгиланган маълумотларга кўра, Эйзенкот блоки 50 ўринни, Нетаньяху блоки эса 52 ўринни эгаллайди.
Кўпчилик ҳукуматини тузиш учун ғолиб Кнессетда камида 61 ўринни эгаллаши керак.
Kan News, Channel 12 ва Channel 13 телеканалларининг экзит-полл маълумотларига кўра, араб партиялари ҳам рекорд миқдордаги ўринларни қўлга киритди: улар Кнессетда 17-18 ўринни эгаллаши тахмин қилинмоқда.
Биринчи қисман расмий натижалар маҳаллий вақт билан ярим тундан кейин чиқа бошлади. Сайлов комиссияси овозларни санаш бир неча кун давом этиши мумкинлиги ҳақида огоҳлантирмоқда.
Нетаньяху хулоса чиқариш учун ҳали эрта эканлигини ва сайлов натижаларини аниқлашдан олдин "ҳақиқий натижалар"ни кутаётганини айтди.
Исроил Марказий сайлов қўмитасининг маълумотларига кўра, бу йилги умумий сайловларда сайловчиларнинг иштироки маҳаллий вақт билан соат 22:00 да, сайлов участкалари ёпилган пайтда 77,7% ни ташкил этди. Қўмита маълумотларига кўра, 5 695 682 киши овоз берган, бу 1999 йилдан бери энг юқори кўрсаткичдир.
BBC мухбири Том Беннет таъкидлаганидек, Исроил араблари аҳолиси кўпчиликни ташкил этадиган шаҳарларда ҳам юқори иштирок кузатилган. Агар араб партиялари сайловчиларнинг катта қўллаб-қувватлашига эга бўлса, бу иккала асосий яҳудий сиёсий блокларининг вакиллигини камайтириши ва 3,25% чегарасидан ўта олмаган баъзи кичикроқ партияларни чиқариб ташлаши мумкин.
Кнессетдаги 120 ўрин учун ўттиз етти партия кураш олиб борди. Мамлакат тарихида ҳеч бир сиёсий куч парламентда мутлақ кўпчиликни (камида 61 ўрин) қўлга киритмаган, шунинг учун барча ҳукуматлар коалицион ҳукуматлар бўлган.
Гади Эйзенкот биринчи экзит-полл натижалари эълон қилинганидан сўнг, экзит-полл натижалари "Нетаньяху ва унинг ҳукуматига тўлиқ ишончсизлик овози берилганини" кўрсатаётганини айтди. Агар бу башоратлар тасдиқланса, мухолифат "халқ хоҳишини бажариш ва Нетаньяху ҳукуматини алмаштириш учун дарҳол ҳаракат қилади", деб қўшимча қилди у.
Исроилдаги асосий сиёсий кучлар ўртасидаги тафовут кўпинча минимал ва экзит-полл ўтмишда сайлов натижаларини ҳар доим ҳам аниқ башорат қилмаган.
Ҳозирги Кнессет сайловлари 2023 йил 7 октябрда Ҳамаснинг Исроильга ҳужуми ва ундан кейинги Ғазо сектори ва Ливандаги урушдан кейинги биринчи сайловдир.
