Қашқадарёда чақалоқни 12 млн сўмга сотмоқчи бўлган эр-хотинлар қамоққа олинди
Суд чақалоқни сотиш ташаббуси эркакдан чиққани ва у ўша вақтда вояга етмаган аёлни жиноятга жалб қилганини қайд этган. Аёлнинг суддаги кўрсатмасига кўра, эри иш топа олмагани сабаб оила моддий жиҳатдан қийналган ва у чақалоқни сотишни таклиф қилган.
Қашқадарё вилояти Нишон туманида чақалоқни 12 млн сўмга сотмоқчи бўлган аёл ва унинг эри жазога тортилди.
Аниқланишича, 2008 йилда туғилган аёл 2025 йилда судланувчи эркак билан танишган. Ўша пайтда аёл бошқа бир йигитдан ҳомиладор бўлганини айтган. Шунга қарамай, эркак унга уйланишини билдирган. Бироқ эркакнинг онаси аёлнинг ҳомиладорлигини билгач, уни келин қилишга қарши чиққан. Шундан сўнг улар Қарши шаҳрида ижарада яшай бошлаган ва шаръий никоҳдан ўтган. Ҳомила катталашгач, эркак уни олдиришни таклиф қилган, бироқ аёл бунга рози бўлмаган.
Аёл 2025 йил 13 ноябрь куни Тошкент шаҳрида қиз фарзандли бўлган. Чақалоққа туғилганлик гувоҳномаси олиниб, унда эркак ота сифатида қайд этилган. Орадан икки ой ўтиб, аёл чақалоғи билан Нишон туманига қайтган, бироқ эркакнинг онаси болани қабул қилишни истамаган.
Аёлнинг суддаги кўрсатмасига кўра, эри иш топа олмагани сабаб оила моддий жиҳатдан қийналган ва у чақалоқни сотишни таклиф қилган.
Эркак Ш.Н. билан танишиб, унга сотиладиган чақалоғи борлигини ва уни минг долларга беришини айтган. Ш.Н. бу ҳақда Нишон тумани ИИБга мурожаат қилиб, кейинчалик тезкор тадбирда шартли харидор сифатида қатнашган. 19 март куни чақалоқни 12 млн сўмга сотаётган вақтда аёл ва эркак ИИБ ходимлари томонидан ашёвий далиллар билан ушланган.
Суд чақалоқни сотиш ташаббуси эркакдан чиққани ва у ўша вақтда вояга етмаган аёлни жиноятга жалб қилганини қайд этган.
Нишон тумани суди ҳукми билан эркак Ф.К. Жиноят кодексининг тегишли моддалари билан айбли деб топилиб, жиноятлар мажмуи бўйича 7 йилга озодликдан маҳрум қилинди. Аёл О.П. эса одам савдосида айбли деб топилиб, 3 йил 6 ойга озодликдан маҳрум қилинди.
