Шахмат тожи учун кураш: Жавоҳир Синдоровнинг имконияти қандай?
Жаҳон чемпионати баҳси олдидан гроссмейстерлар, шахмат вакиллари ва контент яратувчиларнинг 18 та фикри жамланган. Уларнинг 10 нафари Жавоҳир Синдаровни фаворит деб ҳисоблаган бўлса, 6 нафари икки шахматчининг имкониятларини тенг баҳолаган.
Жорий йилнинг 22 ноябридан 12 декабригача Женева шаҳрида жаҳон шахмат тожи учун курашда ҳамюртимиз Жавоҳир Синдаров ҳамда амалдаги чемпион ҳиндистонлик Гукеш Доммаражу баҳс олиб боради.
Жаҳон шахмат юлдузлари мазкур баҳс олдидан ҳар икки иштирокчиларнинг имкониятларини баҳолади. Бу ҳақда Uzchess хабар берди.
Айтилишича, жаҳон чемпионати баҳси олдидан гроссмейстерлар, шахмат вакиллари ва контент яратувчиларнинг 18 та фикри жамланган. Уларнинг 10 нафари Жавоҳир Синдаровни фаворит деб ҳисоблаган бўлса, 6 нафари икки шахматчининг имкониятларини тенг баҳолаган. Фақат 2 нафари Гукешнинг имкониятларини юқори баҳолаган.
Жумладан, норвегиялик гроссмейстер Магнус Карлсен Синдаровнинг ғалабасига ишонаётганини билдирган. Унинг фикрича, ўзбекистонлик шахматчининг ўйини ҳар томонлама мукаммалроқ.
Россиялик гроссмейстерлар Ян Непомнящий ва Владислав Артемьев ҳам Синдаровни фаворит деб ҳисоблашмоқда. Непомнящий имкониятларни 65:35, Артемьев эса 60:40 нисбатида ўзбекистонлик шахматчи фойдасига баҳолаган.
Амалдаги жаҳон чемпиони Гукешни эса таниқли америкалик гроссмейстер Ҳикару Накамура фаворит сифатида кўрсатган. Накамуранинг таъкидлашича, Гукеш босимни енга олса, кутилганидан ҳам яхшироқ натижа қайд этиши мумкин.
