"Ўзбекистон темир йўллари" АЖ Берлинда бир қатор стратегик музокаралар ўтказди
Сербия темир йўллари маъмурияти билан бўлиб ўтган музокараларда АЖнинг Сербия магистралларини модернизация қилиш бўйича келажакдаги қўшма лойиҳаларда иштирок этиши масаласи кўтарилди. "Deutsche Bahn" билан музокаралар доирасида ўзбекистонлик мутахассис-темирйўлчиларни малака оширишга юбориш, шунингдек, темир йўл соҳасида қўшма илмий ишланмаларни йўлга қўйиш бўйича келишувларга эришилди.
"Ўзбекистон темир йўллари" акциядорлик жамияти бошқаруви раисининг биринчи ўринбосари Х. Рахметов бошчилигидаги делегация "InnoTrans-2026" дунёдаги энг йирик транспорт технологиялари кўргазмаси доирасида учрашувларга бой дастур ўтказди.
Германия пойтахтида бўлиб ўтган музокаралар халқаро ҳамкорликнинг бир нечта асосий йўналишларини қамраб олди ва Ўзбекистоннинг темир йўл соҳасидаги глобал технологик ва логистика жараёнларининг фаол иштирокчиси мақомини мустаҳкамлади.
Ишбилармонлик дастурининг марказий воқеаларидан бири Европа комиссиясининг халқаро ҳамкорлик бўйича вакиллари билан учрашув бўлди. Осиё, Марказий Осиё ва Тинч океани минтақаси бўйича директор Петерис Устубс "Ўзбекистон темир йўллари" АЖ раҳбариятига кўргазмада фаол иштирок этаётгани учун миннатдорлик билдириб, унинг стратегик аҳамиятини таъкидлади. Мулоқот якунида Европа Иттифоқи вакиллари Ўзбекистон темир йўл тармоғини ривожлантиришда ҳар томонлама ёрдам кўрсатишга тайёрлигини билдирди.
Темир йўл ҳаракат таркибини ишлаб чиқариш бўйича жаҳон етакчиси бўлган Хитойнинг "CRRC Corporation Limited" корпорацияси раҳбарияти билан муҳим учрашув бўлиб ўтди. Директорлар кенгаши раиси Сунь Юнцай ташрифнинг тарихий хусусиятини алоҳида таъкидлади: Ўзбекистон "InnoTrans"да биринчи марта бундай нуфузли делегация билан иштирок этмоқда, бу эса мамлакатнинг инфратузилмани янгилаш бўйича кенг кўламли режаларидан далолат беради.
"Ўзбекистонни глобал халқаро темир йўл транспорти кўргазмасининг фаол иштирокчилари қаторида кўриб турганимиздан мамнунмиз", — деди "CRRC Corporation Limited" раҳбари.
Суҳбат чоғида амалдаги қўшма лойиҳалар, жумладан, янги поездларни техник қўллаб-қувватлаш ва локомотивлар харид қилиш масалалари атрофлича муҳокама қилинди. Муҳим натижалардан бири "Ўзбекистон темир йўллари" АЖ саноат корхоналари базасида локомотивларни таъмирлаш ва уларга хизмат кўрсатиш бўйича замонавий сервис марказини ташкил этиш, шунингдек, ғилдирак изини (кенглигини) ўзгартириш имкониятига эга бўлган замонавий юк вагонларини ишлаб чиқариш лойиҳасини бошлаш масаласини кўриб чиқиш бўлди. Томонлар ҳамкорлик кўламини кенгайтириш ниятида эканликларини тасдиқладилар.
Учинчи муҳим йўналиш Жанубий Кореянинг "Hyundai Rotem" компанияси директорлар кенгаши раиси Ли Ён Бэ билан музокаралар бўлди. Учрашувнинг асосий натижаси йўловчиларнинг қулайлик даражасини ошириш мақсадида тезюрар поездларнинг сўнгги икки вагонини ўзгартириш бўйича келишув бўлди. Эришилган келишувларга кўра, компания бизнес-класс ўриндиқлари ўрнига столли VIP ўриндиқларни (ҳар бир поездда биттадан вагон) ўрнатишга тайёрлигини билдирди.
Бундан ташқари, томонлар саккизта тезюрар электропоездни сотиб олиш бўйича янги шартнома концепциясини муҳокама қилишга ўтдилар. Ҳар бир янги таркибга замонавий капсула ўриндиқлари билан жиҳозланган VIP-вагонларни киритиш бўйича ўзаро келишувга эришилди. Якуний конфигурация, жойларнинг аниқ сони ва техник хусусиятлари техник ҳужжатларни тайёрлаш жараёнида батафсил ишлаб чиқилади.
Делегация эътибори Европа қитъасига ҳам қаратилди. Сербия темир йўллари маъмурияти билан бўлиб ўтган музокараларда "Ўзбекистон темир йўллари" АЖнинг Сербия магистралларини модернизация қилиш бўйича келажакдаги қўшма лойиҳаларда иштирок этиши масаласи кўтарилди.
Шу билан бирга, "Deutsche Bahn" билан музокаралар доирасида ўзбекистонлик мутахассис-темирйўлчиларни малака оширишга юбориш, шунингдек, темир йўл соҳасида қўшма илмий ишланмаларни йўлга қўйиш бўйича келишувларга эришилди.
Шунингдек, кўргазма доирасида Хитойнинг "Huawei" компанияси ва бошқа етакчи технологик корпорациялар билан темир йўл соҳасида рақамлаштириш ва инновацияларни ривожлантиришга бағишланган бир қатор учрашувлар бўлиб ўтди.
