Суҳроб Хўжаев Осиё ўйинлари чемпиони: Ўзбекистоннинг олтинлари 7 тага етди
Ҳозирда бешинчи ўринда бораётган жамоада 15 та кумуш ва 9 та бронза ҳам бор. Энди тўртинчи ўриндаги Қозоғистон билан орани битта олтин ажратиб турибди.
Енгил атлетика бўйича Ўзбекистон жамоаси аъзоси Суҳроб Хўжаев Осиё ўйинлари чемпионлигига эришди.
Босқон улоқтириш баҳсларида иштирок этган ушбу спортчи 74.38 метр натижа билан олтин медалга эга чиқди.
Қайд этиш керакки, Хўжаев бу натижага учинчи уринишда эришди. Бунгача у 2 марта – 2018 йил Жакартада ўтказилган турнирда ҳамда 2023 йил Ҳангчжоу мезбонлигидаги Осиё ўйинларида бронза медал билан кифояланганди.
Кун давомида Ўзбекистон делегацияси вакиллари 3 та кумуш ва битта бронза медал ҳам қўлга киритганди.
Шу тариқа, Ўзбекистон ўз ҳисобидаги олтин медаллар сонини 7 тага етказди (15 та кумуш ва 9 та бронза) ва умумий рейтингдаги бешинчи ўринни мустаҳкамлади. Энди тўртинчи ўриндаги Қозоғистон билан орани битта олтин ажратиб турибди.
