Тошкентда мактаб қўриқчиси 12 ёшли қизга шилқимлик қилди
Мазкур ҳолат 15 сентябр куни Шайхонтоҳур туманидаги мактаблардан бирида рўй берган. Таълим масканида қўриқлаш хизмати ходими бўлиб ишлаб келган 23 ёшли йигит 6-синф қизга ножўя ҳаракатлар қилган. Суд ҳуқуқбузарликда жиноят аломати бор, деган хулосага келиб, ишни прокурорга қайтарган.
Шайхонтоҳур туманида мактаб қўриқчиси 12 ёшли қизга шаҳвоний шилқимлик қилди.
Platina.uz танишган суд ҳужжатига кўра, 23 ёшли Ш.Ж. мактабда шартнома асосида қўриқчи бўлиб ишлаган. У 15 сентябр куни соат 15:30 да мактаб биносида 12 ёшли ўқувчи қизнинг олдига борган ҳамда унинг белидан ушлаб, лабидан ўпган.
Суриштирув органи Ш.Ж. содир қилган ҳаракатни Маъмурий жавобгарлик тўғрисидаги кодекснинг 41-1-моддаси 1-қисми (шаҳвоний шилқимлик қилиш) билан квалификация қилган ва ишни судга юборган. Суд эса Ш.Ж.га нисбатан қўзғатилган маъмурий ишни кўриб чиқиб, унда жиноят аломати бор, деган хулосага келган ва уни прокурорга қайтариш ҳақида ажрим чиқарган.
“Ш.Ж. шаҳвоний шилқимлик ҳаракатларини вояга етмаган, 2014 йилда туғилган қизга нисбатан содир этган ёки этмаганлиги, унинг ҳаракатларида жиноят аломатлари бор ёки йўқлиги ва иш ҳолатлари тўлиқ текширилмаган. Қайта суриштирув жараёнида иш ҳолатлари тўлиқ текширилиб, Ш.Ж.нинг ҳаракатларида жиноят аломати бор ёки йўқлигини, жиноят содир қилинган бўлса унинг ҳаракатларига тегишли баҳо берилиши лозим бўлади”, дейилади суд ажримида.
