60 млрд сўмлик қурилиш ишларини олиб бермоқчи бўлганлар ушланди
Зангиотада 3 нафар шахс Ички ишлар вазирлигига қарашли боғчалардаги қурилиш ва таъмирлаш ишларини олиб бериш эвазига МЧЖ раҳбаридан 100 000 доллар талаб қилган. Улар бу ишни юқори лавозимларда ишловчи танишлари орқали ҳал қилмоқчи бўлган.
Зангиота туманида фирибгарлик фош этилди.
Прокуратура департаментига кўра, 3 нафар шахс ўзаро тил бириктириб “S.C.” МЧЖ раҳбари М.Н.га юқори лавозимдаги танишлари орқали ИИВга қарашли 4 та давлат мактабгача таълим ташкилотидаги 60 млрд сўмлик реконструкция ва қурилиш ишларини олиб беришни ваъда қилган.
Улар “хизмат” учун 100 000 АҚШ доллари сўраган. Шундан 20 000 АҚШ долларини олган вақтида ашёвий далиллар билан ушланган.
Ҳозирда, мазкур ҳолат юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят иши қўзғатилиб, тергов ҳаракатлари ўтказилмоқда.
