Самарқанддаги шахмат олимпиадасида Исроилга техник мағлубият ёзилди
Бунга Йом-Киппур диний байрами муносабати билан ўйинлар вақтини ўзгартириш бўйича берилган сўров рад этилгани сабаб бўлди. Аввал Покистон Исроилга қарши ўйнашдан бош тортганди.
2026 йилги шахмат Олимпиадасида Исроилнинг эркаклар ва аёллар термалари 6-тур учрашувларида иштирок этмади.
Бунга Йом-Киппур диний байрами муносабати билан ўйинлар вақтини ўзгартириш бўйича берилган сўров рад этилгани сабаб бўлди. Бу ҳақда "World Chess" хабар қилди.
Самарқандда ўтказилаётган шахмат Олимпиадасининг 6-турида Исроилнинг эркаклар термаси Нидерландия, аёллар термаси эса Болгарияга қарши баҳс олиб бориши керак эди. Бироқ икки жамоа ҳам белгиланган вақтда ўйинга чиқмади.
Натижада Нидерландия эркаклар ўртасидаги баҳсда, Болгария эса аёллар ўртасидаги учрашувда 4:0 ҳисобида техник ғалаба қайд этди. Бу учрашувларда бирорта ҳам юриш амалга оширилмаган.
Исроил томони 6-тур учрашувларини Йом-Киппур муносабати билан ўзгартиришни сўраган. Жамоа баҳсларни 21 сентябрь куни маҳаллий вақт билан соат 19:30 дан кейин бошлаш ёки 22 сентябрь — Олимпиададаги дам олиш кунига кўчиришни таклиф қилган.
Жаҳон шахмат федерацияси (FIDE) ушбу таклифни Нидерландия ва Болгария томонига етказган. Бироқ икки жамоа ҳам белгиланган вақтни ўзгартиришга рози бўлмаган.
FIDE вакилига кўра, мусобақа қоидаларига асосан рақиб жамоалар бундай сўровни рад этиш ҳуқуқига эга.
Эслатиб ўтиш керак, аввал Покистон термаси Исроилга қарши ўйнамагани учун техник мағлубият ёзилганди.
