Автомобил эҳтиёт қисмлари бозоридаги жиноий гуруҳга ҳукм ўқилди

Учтепа туманидаги "Автомобил эҳтиёт қисмлари бозори"да ноқонуний фаолият олиб борган жиноий гуруҳга суд ҳукми чиқарилди.

Бугун жиноят ишлари бўйича Учтепа туман судида 14 нафар судланувчига доир жиноят иши юзасидан суд ҳукми ўқилди. Бу ҳақда Тошкент шаҳар судлари хабар берди.

“Автомобил эҳтиёт қисмлари бозори” ҳудудида товламачилик билан шуғулланганликда айбланган судланувчиларга, жиноий хатти-ҳаракатларидан келиб чиқиб, 3 йилдан 6,5 йилгача бўлган муддатга озодликдан маҳрум этиш жазолари тайинланди.

Айрим судланувчилар (муқаддам судлангани боис) тайинланган жазони қаттиқ тартибли, айримлари умумий тартибдаги жазо колонияларида ўташи белгиланди.

Суд жараёни якунида раислик этувчи судья томонидан ҳукм мазмуни, унга нисбатан шикоят бериш тартиби ва муддатлари тушунтирилди, дейилади хабарда.