Республиканинг 8 та тиббиёт марказида нархлар мақбуллаштирилади

Рақобат қўмитаси томонидан 8 та республика ва ҳудудий илмий-амалий тиббиёт марказларига нархларни мақбуллаштириш бўйича кўрсатма берилди.

Рақобат қўмитаси томонидан 2026 йил апрел ойидан бошлаб Республика ихтисослаштирилган илмий-амалий тиббиёт марказларида кўрсатилаётган тиббий хизматлар нархларининг адолатли шакллантирилганлигини ўрганиш ишлари олиб борилмоқда.

Жорий йилнинг май ойига қадар 8 та республика ва ҳудудий илмий-амалий тиббиёт марказларида, жумладан:

- Республика ихтисослаштирилган кардиология илмий-амалий тиббиёт маркази;

- Республика ихтисослаштирилган кўз микрохирургияси илмий-амалий тиббиёт маркази;

- Академик Ё.Х. Тўрақулов номидаги Республика ихтисослаштирилган эндокринология илмий-амалий тиббиёт маркази;

- Академик В. Воҳидов номидаги Республика ихтисослаштирилган хирургия илмий-амалий тиббиёт маркази;

- Республика ихтисослаштирилган урология илмий-амалий тиббиёт маркази;

- Республика ихтисослаштирилган терапия ва тиббий реабилитация илмий-амалий тиббиёт маркази;

- Республика ихтисослаштирилган она ва бола саломатлиги илмий-амалий тиббиёт маркази;

- Республика ихтисослаштирилган дерматовенерология ва косметология илмий-амалий тиббиёт марказида ўрганишлар ўтказилди.

Дастлабки натижаларга кўра, айрим ҳолатларда тарифларни шакллантириш бўйича белгиланган талабларга тўлиқ риоя этилмагани аниқланди.

Шу муносабат билан ўрганиш ўтказилган марказларга тарифларни амалдаги тартиб ва талаблар асосида қайта шакллантириш ҳамда нархларни мақбуллаштириш бўйича тегишли кўрсатмалар берилди.

Шунингдек, ўрганишлар якуни бўйича тиббий хизматлар тарифларини мақбуллаштиришга қаратилган умумлаштирилган таклифлар ишлаб чиқилиб, ваколатли давлат органларига юборилади.