ППХ ходими вояга етмаган қизларга тегажоқлик қилгани айтилди
Ҳозирда ходим лавозимидан четлаштирилди. Агар даъво қилинган ҳаракатлар тасдиқланса, у жиноий жавобгарликка тортилиши билдирилган.
Тошкент вилоятида ППХ ходими 14 ёшли қизни дугонаси билан бирга тоғли ҳудудга олиб бориб, уларга шилқимлик қилгани бўйича хабар тарқалди.
ИИВ Жамоат хавфсизлиги департаменти баёнот бериб, мазкур ҳолат юзасидан текширув бошланганини билдирди.
Ҳодиса Оҳангарон шаҳрида содир бўлган. Қизнинг айтишича, Spark машинаси кўчада тўхтаб, унинг эгаси қизларни машинга ўтиришга мажбурлаган. Улар ИИВ ходимларидан шубҳаланмай, машинага ўтирган. Сўнгра жабрланувчининг акаси геолокация орқали бориб вазиятга аралашган.
Вояга етмаган қиз ходим унга СМС хабарлари ёзганини ҳам даъво қилди.
Ички ишлар вазирлигининг Ички хавфсизлик бўлими прокуратура билан ҳамкорликда ушбу ҳодиса бўйича дарҳол тергов бошлади. Ҳодисанинг барча иштирокчилари ва ҳолатлари аниқланди.
Нашрларда тилга олинган ходим лавозимидан четлаштирилди. Агар даъво қилинган ҳаракатлар тасдиқланса, уларнинг ҳаракатлари қатъий қонуний чоралар, жумладан, жиноий жавобгарликка тортилади.
"Ҳуқуқни муҳофаза қилиш органлари ходимларининг, айниқса вояга етмаганларга нисбатан ҳар қандай ноқонуний хатти-ҳаракатлари қабул қилиниши мумкин эмаслигини ва қаттиқ жазоларга олиб келишини таъкидлаймиз", дейилади ИИВ Жамоат хавфсизлиги департаменти хабарида.
Тергов натижалари кейинроқ эълон қилинади.
