Швейцарияда Гулнора Каримова билан боғлиқ йирик коррупцион иш кўриб чиқилади

Швейцарияда Гулнора Каримова билан боғлиқ йирик коррупцион иш кўриб чиқилади.

Швейцарияда Гулнора Каримова иши бўйича суд жараёни бошланмоқда, жорий йил бошида у яна сўроқ қилингани маълум бўлди.

27 апрел куни Швейцариянинг Беллинцона шаҳридаги Федерал жиноят суди узоқ йиллардан бери давом этиб келаётган йирик коррупция ишини кўриб чиқишни бошлайди.

Иш марказида Ўзбекистоннинг биринчи президенти Ислом Каримовнинг тўнғич қизи Гулнора Каримова турибди.

Маълумотларга кўра, Каримова ва унинг ҳамкорлари телекоммуникация компанияларидан Ўзбекистон бозорига кириш эвазига пора талаб қилган кенг қамровли тармоқни шакллантиргани тахмин қилинмоқда. Ушбу тизим бир неча йил давомида фаол бўлган.

Швейцария Бош прокуратураси 2012 йилда Каримовага нисбатан коррупция, жиноий гуруҳда иштирок этиш ва пул ювиш айбловлари билан иш очган. Кейинчалик, 2015 йилда Женевадаги хусусий банк собиқ ходими ҳам терговга тортилиб, ноқонуний маблағларни яширишга ёрдам берганликда гумон қилинган.

Ишнинг эътиборли жиҳатларидан бири — тергов ва суд жараёни йиллар давомида чўзилиб, ҳозиргача давом этаётганидир. Воқеалар 2008 йилларга бориб тақалади. Ҳатто Швейцария суд амалиётида илк бор суд чет давлатга чиқиб, сўроқ ўтказган. 2026 йил бошида Каримова Тошкентда яна сўроқ қилингани айтилмоқда.

“Каримованинг 2014 йилдан буён Ўзбекистонда қамоқда сақланаётгани ва унинг ҳибс шароитлари халқаро ташкилотлар томонидан танқид қилингани ҳам ишга қўшимча мураккаблик киритган”, деб ёзмоқда Швейцариянинг молиявий нашри Finews.

Нашрнинг қўшимча қилишича, суд жараёнида яна бир муҳим савол бор: асосий айбланувчилар Беллинцонадаги суд мажлисида шахсан иштирок этадими ёки йўқ? Каримованинг иштироки эҳтимоли паст деб баҳоланган, унинг шериги қаердалиги эса номаълум.