Ўзбекистон айрим турк компаниялари кўчат ва уруғларига вақтинча тақиқ жорий этди
Туркиянинг бир қатор компанияларида етиштирилган кўчат ва уруғларда хавфли касалликлар аниқланган.
Ўзбекистон айрим турк компаниялари кўчат ва уруғларига вақтинча тақиқ жорий этди.
Ўзбекистонда Туркиянинг айрим компанияларида етиштирилган уруғ ва экиш материалларини импорт қилиш вақтинча тақиқланади. Бу ҳақда Қишлоқ хўжалиги вазирлиги ҳузуридаги Ўсимликлар карантини ва ҳимояси агентлиги директорининг 2026 йил 3 апрелдаги 53-сон буйруғида белгиланди.
Мазкур қарор ўсимликлар карантини соҳасидаги фитосанитар хавфсизликни таъминлаш, хусусан, мамлакат ҳудудига карантин аҳамиятига эга зарарли организмларнинг кириб келиши ва тарқалишининг олдини олиш мақсадида қабул қилинган.
Ҳужжатда қайд этилишича, Туркиянинг бир қатор компанияларида етиштирилган кўчат ва уруғларда хавфли касалликлар аниқланган.
Жумладан, нектарин, шафтоли ва ўрик кўчатларида “шафтоли яширин мозаика вироиди” (Peach latent mosaic viroid — PLMVd), данак мевали дарахтларда “некротик доғланиш вируси” (Prunus necrotic ringspot virus — PNRSV), тарвуз уруғларида эса “қовоқ экинларининг бактериал доғланиши” (Acidovorax citrulli) касалликлари аниқлангани таъкидланган. Ушбу ҳолатлар Марказий фитосанитария лабораторияси экспертиза хулосалари билан тасдиқланган.
Шу асосда Туркиянинг “Maksinn Kurumsal Hizmetler Ticaret Limited Sirketi”, “Saygi Fidancilik Tarim Urunleri Sanayi Ve Ticaret Limited Sirketi”, “Favori Fidancilik Tarim Hayvancilik Tasimacilik Limited Sirketi” ҳамда “Argeto Sebze Tohumlari Islah Uretim Ve Pazarlama Limited Sirketi” компанияларида етиштирилган уруғ ва экиш материалларини Ўзбекистон ҳудудига олиб киришга 2026 йил 3 апрелдан бошлаб тақиқ жорий этилган. Мазкур чеклов аниқланган камчиликлар бартараф этилгунига қадар амал қилади.
Қарорда, шунингдек, аввал олиб келинган ва зарарланган деб топилган маҳсулотлар йўқ қилингани ҳам қайд этилган. Хусусан, 203 мингдан ортиқ нектарин, 32 мингта шафтоли, 5 мингта ўрик кўчатлари ҳамда 1000 килограмм тарвуз уруғи амалдаги тартиб асосида ёқиш орқали утилизация қилинган. Бу маҳсулотлар карантин остидаги зарарли организмлар тарқалишининг олдини олиш мақсадида йўқ қилинган.
Бундан ташқари, Туркиянинг ўсимликлар карантини бўйича ваколатли органига 12 та расмий эътирознома юборилган.
Буйруққа мувофиқ, эндиликда ушбу компаниялар маҳсулотларини импорт қилиш бўйича аризалар кўриб чиқилишида тақиқ талаблари қатъий инобатга олинади. Шунингдек, ҳудудий бўлинмалар ва ташқи карантин назорати органларига мазкур маҳсулотлар устидан кучайтирилган фитосанитар назорат ўрнатиш топширилган. Аниқланган ҳар қандай ҳолат бўйича маълумотлар 24 соат ичида махсус “E-Fitouz” ахборот тизимига киритилиши лозим.
Шу билан бирга, тегишли ташкилотларга мазкур тақиқ ҳақида Туркия томони дипломатик каналлар орқали хабардор қилиниши, шунингдек, оммавий ахборот воситалари ва расмий платформалар орқали кенг жамоатчиликка етказилиши вазифаси юклатилган.
Қайд этилишича, келгусида Ўсимликлар карантини ва ҳимояси агентлиги томонидан ўтказиладиган фитосанитар хавф таҳлили натижаларига кўра мазкур тақиқни бекор қилиш масаласи кўриб чиқилиши мумкин.
