Politico: Трампнинг НАТО бош котиби билан учрашуви жанжалга айланди
Трамп ўз иттифоқчилари Эронга қарши урушда қўлламагани учун "қасос" ваъда қилган.
АҚШ президенти Доналд Трамп НАТО бош котиби Марк Рютте билан учрашув чоғида иттифоқчиларини танқид қилди ва Яқин Шарқдаги урушда АҚШни қўллаб-қувватламагани сабабли қасос чораларини кўришни кўриб чиқаётганини айтди.
Бу ҳақда Politico ўз манбаларига асосланиб хабар берди.
"Ҳаммаси нотўғри кетди. Суҳбат ҳақоратларга тўла бўлди", деди европалик амалдорлардан бири.
Бу манба Трамп қасос чораларини ваъда қилганини тасдиқлади. Иккинчи манба эса Politico нашрига учрашувда иштирок этганлар Президент Трамп ўз иттифоқчиларидан Ҳормуз бўғозини тезда қайта очиш учун "аниқ чоралар" кўришини кутаётганини айтишди.
Бироқ, Оқ уй вакили Politico нашрига Трамп Рютте билан суҳбатида иттифоққа ҳеч қандай талаб қўймаганига ишонтирди.
Яна бир европалик амалдорга кўра Трамп иттифоқчиларига қарши ҳеч қандай "аниқ таҳдидлар" қилмаган. "Бу унинг бошқа шарҳларидан фарқ қилади", деб таъкидлади у.
Марк Рюттенинг ўзи кеча Доналд Трамп билан учрашув дўстона муҳитда ўтганини айтди. НАТО Бош котиби баъзи иттифоқ мамлакатлари Эрон билан можарода Қўшма Штатларга ёрдам беришдан бош тортиб, "синовдан ўта олмаганига" қўшилди. Рютте шунингдек, НАТОнинг Ҳормуз бўғози орқали юк ташишни таъминлашда иштирок этиш имкониятини ҳам истисно қилмади.
17 март куни Доналд Трамп Европа иттифоқчиларини Эронга қарши операцияда ва Ҳормуз бўғозини очишда ёрдам беришдан бош тортгани учун танқид қилди. 1 апрель куни The Telegraph нашрига берган интервьюсида президент иттифоқдан чиқишни кўриб чиқаётганини айтди. Reuters агентлигининг манбаларга асосланиб хабар беришича, Трамп иттифоқчилар яқин кунларда Ҳормуз бўғозини қайта очишга ваъда беришларини кутмоқда.
