Тошкент шаҳрининг ижро этувчи ҳокимият тузилмаси тасдиқланди
Пойтахт ҳокимида 12 нафар ўринбосар мавжуд бўлади. Улар орасида иккита биринчи ўринбосар (иқтисодиёт ва қурилиш-экология), каналлардан фойдаланиш бўйича ўринбосар кабилар бор.
Тошкент шаҳар ижро этувчи ҳокимият тузилмаси тасдиқланди. Бу ҳақда ҳоким Шавкат Умрзоқовнинг тегишли қарори эълон қилинди.
Қарор 2026 йил 27 март куни чиққан. Унга кўра, пойтахт ҳокимида 12 ннафар ўринбосар мавжуд бўлади. Улар орасида иккита биринчи ўринбосар (иқтисодиёт ва қурилиш-экология), каналлардан фойдаланиш бўйича ўринбосар, хотин-қизлар, жамоат ва диний ташкилотлар бўйича ўринбосар ва бошқалар бор.
Шунингдек, ҳокимга олти нафар маслаҳатчи бўлади. Улар ҳарбий, тил масалалари бўйича, қурилиш ва сунъий интеллект бўйича бўлади. Бошқарув ходимларининг умумий чекланган сони — 102 та.
Туман ҳокимликлари ўзларининг идоравий ҳужжатларини ушбу қарорга мувофиқлаштиради.
Мазкур қарорнинг ижросини назорат қилиш Тошкент шаҳар ҳокимлиги Ташкилий- кадрлар гуруҳи раҳбари вазифасини бажарувчи Х.Турғунов зиммасига юкланган.
