Трамп Буюк Британиянинг Хитой билан яқинлашувига кескин муносабат билдирди

Трамп Буюк Британиянинг Хитой билан яқинлашувини танқид қилди.

АҚШ президенти Доналд Трампнинг фикрича, Хитой билан иқтисодий алоқаларни кенгайтириш Ғарб давлатлари, жумладан Буюк Британия ва Канада учун жиддий хатарлар туғдириши мумкин.

АҚШ президенти Буюк Британия бош вазири сэр Кир Стармер Хитой Республикаси раиси Си Цзинпин билан учрашуви, Буюк Британия ва Хитой ўртасида бизнес ҳамда инвестицияларни кенгайтиришга қаратилган келишувларга кескин муносабат билдирди.

Буюк Британия бизнес вазири Крис Браянт Трампнинг фикрларини нотўғри деб баҳолаб, “очиғи, Буюк Британия учун Хитойнинг жаҳон саҳнасидаги мавжудлигини эътиборсиз қолдириш тентаклик бўлар эди”, деди.

Бизнес вазири, шунингдек, Трампнинг ўзи ҳам апрел ойида Хитойга ташриф буюриши режалаштирилганини эслатди.

АҚШ президентидан журналист: “Буюк Британиянинг Хитой билан бизнес қилишига қандай қарайсиз?” — деб сўради.

Қисқа изоҳларидан сўнг Трамп Буюк Британиянинг Хитой билан ҳамкорлиги ҳақида бошқа гапирмади ва мавзуни Канадага буриб, унга нисбатан ҳам шунга ўхшаш огоҳлантириш берди.

Унинг айтишича, бу “Канада учун янада хавфлироқ”.

“Канаданинг аҳволи яхши эмас. Улар жуда ёмон аҳволда, ва Хитойни ечим сифатида кўриб бўлмайди”, — деди Трамп.

Аввалроқ АҚШ президенти Канада бош вазири Марк Карни Пекинга қилган сўнгги ташрифи чоғида Хитой билан тузилган иқтисодий келишувлар амалга оширилса, Канадага божлар жорий этиш билан таҳдид қилган эди.

Хитой ва Буюк Британиянинг янги алоқалари

Хитойдаги Британия Савдо палатаси раиси Крис Торренс сэр Кирнинг Пекинга ташрифини “муваффақиятли” деб баҳолади.

BBCʼга берган интервьюсида “Буюк Британия учун Хитойга юзланиш мантиқий, чунки у йирик савдо ҳамкорларидан бири”, деди. Торренснинг қўшимча қилишича, бошқа Ғарб етакчилари ҳам яқинда Пекинга борган ёки яқин орада боришни режалаштирмоқда.

“АҚШ эҳтимол Хитой билан келишув қилаётган давлатларга нисбатан санкциялар ва божлар жорий этаётгандир, аммо ўзи ҳам Хитой билан келишувга бориши мумкин. Ҳатто биз буни жорий йилнинг ўзида кутяпмиз”, — деди у BBCʼга.

Британия бош вазирининг Хитойга ташрифи давомида бир қатор муҳим келишувларга эришилди. Жумладан, визасиз саёҳат ва виски божларини камайтириш бўйича битимлар, шунингдек, AstraZeneca компаниясининг Хитойда ишлаб чиқариш қувватларини қуриш учун 10,9 миллиард фунт стерлинг миқдоридаги инвестицияси эълон қилинди.

Уюшган жиноятчилик ва ноқонуний миграцияга қарши курашишга қаратилган келишув доирасида Буюк Британия ва Хитой одам савдогарларининг таъминот йўлларини аниқлаш учун разведка маълумотлари билан ўртоқлашади.

Бизнес ва савдо вазирлиги маълумотларига кўра, 2025 йилда АҚШ Буюк Британиянинг энг йирик савдо ҳамкори бўлган, Хитой эса тўртинчи ўринни эгаллаган.