Тошкентда одамлардан қўрқитиш, калтаклаш ва зўравонлик эвазига пул ундириб келган жиноий гуруҳ қўлга олинди
Улар ўзларини "кўчада муаммоларни ҳал қилувчи етакчилар" сифатида кўрсатган.
Тошкент шаҳрининг Олмазор туманида фуқароларнинг пулларини зўравонлик билан тортиб олган уюшган безори гуруҳ қўлга олинди.
Ички ишлар вазирлиги Тезкор-қидирув департаменти, унинг маҳаллий бўлинмалари, Давлат хавфсизлик хизмати ҳамда Олмазор тумани прокуратураси томонидан ўтказилган махсус рейд натижасида "товламачилик" жинояти билан шуғулланган жиноий гуруҳ аъзолари ушланди.
Гуруҳ аъзоларидан бири — 2007 йилда туғилган шахс бўлиб, у аввалроқ Ўзбекистон Жиноят кодексининг 169 ва 277-моддалари бўйича судланган эди. Бироқ ўз хатосидан хулоса чиқармай, яна жиноят содир этишда давом этган.
Жиноятчилар ўзларини "кўчада муаммоларни ҳал қилувчи етакчилар" деб кўрсатиб, нотаниш одамларни қўрқитиш, калтаклаш ва зўравонлик қўллаш орқали улардан мунтазам равишда пул ундириб келган.
Хусусан, улар узоқ вақтдан бери кузатиб юрган 2007 йилда туғилган бир жабрланувчидан доимий равишда пул талаб қилиб, агар пул берилмаса ёки муддат ўтказиб юборилса, уни дўппослаш билан бирга оила аъзоларининг ҳаёти ва саломатлигига таҳдид солиб келган.
Жабрланувчидан дастлаб 100 АҚШ доллари, кейинги ойда 2,5 миллион сўм, ундан кейин эса яна 24 миллион 896 минг сўм миқдорида пул олишган.
Жабрланувчига "юклаб қўйилган" 14 000 АҚШ доллари миқдорида пулдан 2000 АҚШ долларини олаётган пайтда уюшган гуруҳ аъзолари ашёвий далиллар билан бирга қўлга олинди.
Ушбу безори тўдага нисбатан Ўзбекистон Республикаси Жиноят кодексининг 165-моддаси 2-қисми "б" ва "в" бандлари бўйича жиноят иши қўзғатилди.