Қорақалпоғистонда наркосавдогарлар ушланди

ДХХ наркосавдогарларни қўлга олди.

ДХХ Қорақалпоғистон Республикаси бўйича бошқармаси ва ИИВ тезкор ходимлари ҳамкорлигида гиёҳвандлик воситаларининг ноқонуний айланмасига қарши курашиш доирасида Нукус шаҳрида тезкор тадбир ўтказилган.

Унда 1972 й.т., муқаддам судланган маҳаллий фуқаро 9 г “опий” моддасини Шуманай туманида яшовчи, 1965 й.т. мижозга 4 млн сўмга сотган вақтида уларнинг ноқонуний ҳаракатларига чек қўйилди.

Шунингдек, нукуслик наркосавдогарнинг ёнидан қўшимча 5 г “опий” ҳам олинди.

Аниқланишича, у ажал оғусини ўзининг 1981 й.т., муқаддам гиёҳвандлик воситалари савдоси билан боғлиқ жинояти учун судланган танишидан олган бўлиб, Хўжайли туманида давом эттирилган тезкор тадбирда мазкур шахс 20 г “опий”ни 8 млн сўмга сотган вақтида ушланди.

Бундан ташқари, унинг ёнида бўлган сумкадан ҳам 1 кг 176 г “опий” моддаси олинди.

Маълум бўлишича, мазкур гиёҳвандлик воситаси Тожикистон Республикасидан контрабанда йўли билан олиб келинган.

Ҳозирда учала қонунбузарга нисбатан Жиноят Кодексининг 28,246-моддаси 2-қисми ва 273-моддаси 5-қисми билан жиноят иши қўзғатилиб, “қамоқ” эҳтиёт чораси қўлланилди.

Таъкидлаш лозимки, қонунчиликка мувофиқ бундай жиноят содир қилган шахслар 10 йилдан 20 йилгача озодликдан маҳрум этилишлари мумкин.

Аввалроқ Фарғонада автомобил бакидан 11 кгдан ошиқ наркотик топилганди.

Бундан ташқари ушбу жараёнда 6945 дона кучли таъсир қилувчи дори воситалари ҳам яширилган.