АҚШ Россиянинг нефт танкерини қўлга олди

АҚШ Венесуэлага ҳужуми доирасида Россиянинг нефт танкерини қўлга олди.

Мамлакатнинг юқори мартабали қонунчиларидан бири эса бу ҳаракатни “очиқдан-очиқ қароқчилик” деб атади.

Россия Транспорт вазирлигининг айтишича, АҚШ ҳарбий-денгиз кучлари Венесуэладан келаётган нефт экспортини тўсиш доирасида Россиянинг "Маринера" номли кемасига чиқиб олганидан сўнг, кема билан алоқа узилган.

Вазирлик баёнотида шундай дейилади:

“1982 йилги БМТнинг Денгиз ҳуқуқи тўғрисидаги конвенциясига мувофиқ, очиқ денгизда сузиш эркинлиги амал қилади ва ҳеч бир давлат бошқа давлат юрисдиксиясида қонуний рўйхатдан ўтган кемаларга нисбатан куч ишлатишга ҳақли эмас.”

Россия АҚШдан экипаж аъзоларига инсоний ва муносиб муносабатда бўлишни ҳамда уларни тез фурсатда ватанига қайтаришни таъминлашни талаб қилмоқда. Бу ҳақда ТАСС давлат ахборот агентлиги Ташқи ишлар вазирлигига таяниб хабар берди.

Аввал “Белла-1” номи билан танилган “Маринера” кемаси илгари Кариб денгизида санкция остидаги танкерлар учун ўрнатилган АҚШ денгиз блокадасидан яширинча ўтишга муваффақ бўлган эди.

Мазкур блокада АҚШнинг Венесуэлага қарши босим сиёсатининг бир қисми бўлиб, у 3 январь куни президент Доналд Трамп АҚШ махсус кучларини юбориб, Венесуэла президенти Николас Мадурони қўлга олдириб, уни гиёҳванд моддалар савдоси бўйича айбловлар юзасидан Ню-Йоркка олиб келиш билан якунланди. Мадуро бу айбловларни рад этган.

“Ҳуқуқни муҳофаза қилиш амалиёти” давомида Венесуэлада ўнлаб одамлар ҳалок бўлганидан сўнг, АҚШ очиқ денгизда очиқдан-очиқ қароқчилик билан шуғулланди”, — деб ёзди Телеграмда ҳукмрон “Ягона Россия” партиясидан депутат Андрей Клишас.

Исмини ошкор этмаслик шарти билан гапирган икки нафар АҚШ расмийси ҳарбий-денгиз амалиёти АҚШ Соҳил қўриқлаш хизмати ва ҳарбий кучлар томонидан амалга оширилганини айтди. Уларнинг сўзларига кўра, ҳудуд яқинида Россиянинг ҳарбий кемалари, жумладан сувости кемаси ҳам бўлган, бироқ АҚШ ва Россия ҳарбий кучлари ўртасида тўқнашув бўлгани ҳақида ҳеч қандай маълумот йўқ.

Москва ва Вашингтон ўртасидаги муносабатлар Россия 2022 йил февралида Украинага бостириб кирганидан сўнг Совуқ урушдан бери энг ёмон ҳолатга тушган эди. Бироқ Трамп ўтган йили иккинчи муддатига киришиб, президент Владимир Путин билан можарони тугатиш йўлларини излаш мақсадида мулоқот бошлагач, муносабатлар бироз юмшаган.

Ядро қуролига эга давлатлар ўртасида ҳарбий ҳодисалар кам учрайди. 2023 йил март ойида АҚШ ҳарбий разведка дрони Россия қирувчи самолётлари томонидан тутиб қолингач Қора денгизга қулаган, бу эса Вашингтоннинг норозилигига ва кескинлашув хавфи ҳақида огоҳлантиришига сабаб бўлган эди.

Венесуэла етакчиси Мадуро Россиянинг сўнгги бир йилдан сал ошиқ вақт ичида ағдарилган иккинчи яқин иттифоқчиси бўлди. Бунгача 2024 йил декабрида Сурия президенти Башар ал-Асад ҳокимиятдан четлатилган эди.

Россия душанба куни муваққат президент сифатида қасамёд қилган Делси Родригесни қўллаб-қувватлашини ва Москва очиқ-ойдин неоколониал таҳдидлар ҳамда ташқи қуролли тажовуз деб атаган ҳолатлар қаршисида Венесуэлага ёрдам беришда давом этишини маълум қилди.

Россияда Янги йил байрамлари ҳали ҳам давом этаётган бир пайтда, президент Владимир Путин Мадурони ҳокимиятдан четлатиш бўйича АҚШ ҳаракатларига ҳозирча омма олдида изоҳ бермади.