Асосий озиқ-овқат маҳсулотларига нисбатан божхона божининг нол ставкаси бўйича муддат узайтирилди

Президентнинг 2025 йил 30 декабрдаги ПФ-269-сонли Фармони имзоланди.

Ушбу ҳужжат аҳолини асосий истеъмол маҳсулотлари билан кафолатли таъминлаш ва иқтисодиёт тармоқларини қўллаб-қувватлашга қаратилган.

Унга кўра, ижтимоий аҳамиятга эга бўлган айрим турдаги товарларга белгиланган божхона божининг нол ставкаларини қўллаш муддати 2027 йил 1 январга қадар узайтирилди.

Вазирлар Маҳкамаси ички бозордаги вазиятдан келиб чиқиб, божхона божининг нол ставкаси қўлланиладиган товарлар рўйхатига ўзгартириш киритиш бўйича таклифлар киритиб боради.

2026 йил 1 январдан бошлаб республикага олиб кириладиган қуйидаги товарлар божхона божидан озод қилинади:

Электромобиллар учун: қувватлантириш станциялари ва уларнинг сервис инфратузилмаси учун технологик асбоб-ускуналар (2028 йил 1 январгача).

Ипакчилик соҳасида: пилла йигириш ва тўқиш дастгоҳлари эҳтиёт қисмлари, тут уруғи ва кўчатлари, ипак қурти уруғлари (2028 йил 1 январгача).

Балиқчилик соҳасида: республикада ишлаб чиқарилмайдиган наслдор она балиқ, увулдириқ, личинка ва балиқ етиштириш учун махсус ускуналар (2029 йил 1 январгача).

Транспорт соҳасида: автобуслар ва электробусларга хизмат кўрсатиш учун технологик асбоб-ускуналар ва эҳтиёт қисмлар (2029 йил 1 январгача).

Экология соҳасида: чиқиндиларни утилизация қилиш ва биологик чирийдиган полимер материаллар ишлаб чиқариш учун зарур бўлган махсус техника ва ускуналар (2031 йил 1 январгача).

2026 йилдан 2031 йилга қадар чиқиндиларни тўплаш, саралаш ва қайта ишлаш билан шуғулланувчи (даромадларининг камида 90 фоизи шу соҳадан бўлган) тадбиркорлар учун фойда солиғи ва ижтимоий солиқ ставкаси 1 фоиз миқдорида белгиланди.

Ушбу Фармон 2026 йил 1 январдан бошлаб кучга киради. Унинг ижросини ташкил қилиш ва назорат қилиш Бош вазир ва унинг ўринбосарлари зиммасига юклатилди.