Таиланд ва Камбоджа бир неча ҳафталик қонли тўқнашувлардан сўнг сулҳга келишди

Таиланд ва Камбоджа бир неча ҳафталик қонли тўқнашувлардан сўнг сулҳга келишди.

Таиланд ва Камбоджа мудофаа вазирлари қўшма баёнотда икки давлат зудлик билан ўт очишни тўхтатиш ҳақида келишувга эришганини маълум қилди.

Икки ҳафтадан ортиқ давом этган қонли тўқнашувлардан сўнг Таиланд ва Камбоджа ўртасида ўт очишни тўхтатиш бўйича келишув имзоланди. Бу ҳақда икки давлат мудофаа вазирлари қўшма баёнотда маълум қилди.

Томонлар ҳозирги фронт чизиғини музлатиб қўйишга ва чегарага яқин ҳудудларда яшовчи фуқароларга уйларига қайтишга рухсат беришга келишиб олди. Бу деярли уч ҳафта давом этган жангларни тўхтатади. Бу даврда юзлаб аскарлар ҳалок бўлгани ва қарийб бир миллион киши кўчишга мажбур бўлгани айтилмоқда.

Сулҳ бугун маҳаллий вақт билан соат 12:00 да кучга кирди. У 72 соат амал қилганидан сўнг, Таиланд томонидан июль ойидан бери ушлаб турилган 18 нафар камбоджалик аскар озод этилади. Баёнотга кўра, бу келишув Хитой ва АҚШ дипломатик ёрдами билан олиб борилган музокаралар натижасида эришилган.

Келишув биринчи навбатда кўчириб юборилган аҳолининг уйларига қайтишини таъминлашни кўзлайди, шунингдек, миналарни тозалаш масаласини ҳам ўз ичига олади.

Таиланд мудофаа вазири Наттҳапҳон Наркпанит бу сулҳни қарши томоннинг самимиятини синовдан ўтказувчи ҳолат деб атади ва агар сулҳ бузилса, Таиланд халқаро ҳуқуққа мувофиқ ўзини ҳимоя қилиш ҳуқуқига эгалигини таъкидлади.

Аввалги сулҳ муваффақиятсиз тугагани сабаб Таиланд бунга эҳтиёткорлик билан ёндашган. Июл ойидаги сулҳ АҚШ воситачилиги билан тузилган бўлса-да, кейинчалик яна жанглар бошланган ва томонлар бир-бирини айблаган.

Декабр ойида ҳам тўқнашувлар давом этди. Таиланд Камбоджа ҳудудига авиация зарбалари берган, Таиланд бу ҳарбий объектларга зарба берилганини айтган бўлса, Камбоджа буни тинч аҳоли уйларига қаратилган ҳужум деб атаган.

Бу сафарги сулҳ қанча давом этиши асосан сиёсий иродага боғлиқ. Айниқса, Камбоджа кўп аскар ва ҳарбий техника йўқотгани, ҳамда Таиланд зарбаларидан жиддий зарар кўргани сабабли барқарор тинчликка эришиш қийин бўлиши мумкин.

Чегара можароси бир асрдан ортиқ вақт аввал бошланган, аммо кескинлик бу йил бошида яна ошган эди. Июль ойида беш кунлик оғир жанглар юзлаб қурбонларга сабаб бўлган ва минглаб одамлар уйларини тарк этишга мажбур бўлганди.

Малайзия ва АҚШ воситачилигида октябр ойида сулҳ имзоланган эди, бироқ ноябрьда Таиланд аскарлари миналардан жароҳатлангач, Бангкок келишувни вақтинча тўхтатди ва хавфсизлик ҳали таъминланмаганини маълум қилди.