Ўзбекистон ва Белгия миграция бўйича илк ҳамкорлик шартномасини имзолади
Шартнома Ўзбекистон фуқаролари учун Белгияда қонуний ишга жойлашиш имкониятларини кенгайтириш, миллий миграция бошқарув тизимида Европа стандартларини жорий этишни кўзда тутади.
Ўзбекистон Миграция агентлиги ва Белгия Қироллиги Ички ишлар федерал хизматининг Иммиграция департаменти икки томонлама муносабатлар тарихидаги биринчи расмий ҳамкорлик ҳужжатини имзоладилар.
Шартнома Ўзбекистон фуқаролари учун Белгияда қонуний ишга жойлашиш имкониятларини кенгайтириш, миллий миграция бошқарув тизимида Европа стандартларини жорий этишга асосланади. Шунингдек, Белгия тажрибасига асосланган таълим дастурларини ўтказиш ва миграция жараёнларининг шаффофлиги ва самарадорлигини ошириш учун агентликлар ўртасида тўғридан-тўғри мулоқотни ўрнатишни назарда тутади.
Белгия Иммиграция департаменти мамлакат миграция сиёсатининг марказий органи бўлиб, кириш, яшаш, рухсатнома бериш ва халқаро ҳимоя учун масъулдир.
Ушбу янги ҳамкорлик формати амалий алоқаларни мустаҳкамлаш ва Ўзбекистонда миграция бошқарув тизимини модернизация қилишга қаратилган.