Болгарияда ҳукумат оммавий норозилик сабаб истеъфога чиқди
Намойишчилар бош вазир Росен Желязков ҳукуматини коррупцияда айблаган. Ўтган ҳафтада намойишларга жавобан ҳукумат кейинги йил учун мўлжалланган баҳсли бюджет лойиҳасини ҳам бекор қилганди.
Болгария Бош вазири ва ҳукумати оммавий норозилик намойишларидан сўнг истеъфо берди.
2020 йилги ҳукумат қулашидан бери мамлакатда етти маротаба сайлов ўтказилди.
Болгария бош вазири ва ҳукумати оммавий норозиликлардан сўнг истеъфога чиқди.
Бош вазир Росен Желязков ҳукумати 10 декабр куни кечаси бутун мамлакат бўйлаб, жумладан пойтахт София марказида ўтказилган норозилик намойишларидан сўнг истеъфога чиқди.
Желязковнинг кескин ҳаракати парламентдаги ишончсизлик вотуми беришидан олдин, шунингдек, Болгария евро ҳудудига қўшилишидан 20 кун аввал эълон қилинди.
Норозилар январ ойидан буён унинг ҳокимиятда озчиликни ташкил қилган марказ-ўнг ҳукуматини кенг кўламли коррупцияда айблаб келаётган эди. Ўтган ҳафтада намойишларга жавобан ҳукумат кейинги йил учун мўлжалланган баҳсли бюджет лойиҳасини ҳам бекор қилган эди.
"Биз ҳукуматга қарши норозилик билдираётган фуқароларнинг овозини эшитдик", деди Желязков телемурожаатида. "Ёшлар ҳам, кексалар ҳам истеъфомиз учун овозларини кўтарди", дея қўшимча қилди у. "Бу фуқаролик энергияси қўллаб-қувватланиши ва рағбатлантирилиши керак."
Ҳукумат сайтида эълон қилинган баёнотга кўра, янги кабинет шакллангунча амалдаги вазирлар ўз лавозимида қолади.
Софиянинг марказидаги “Ҳокимият Учбурчаги” ва “Мустақиллик майдони”да 10 декабрь оқшоми 50 мингдан 100 минггача одам ҳукумат истеъфосини талаб қилиб тўпланган. Парламент биносига “Истеъфо” ва “Мафия чиқиб кетсин” деган сўзларни ёзишган.
Уларнинг талаблари ўтган ҳафтада президент Румен Радев томонидан ҳам қўллаб-қувватланган, у ҳам ҳукуматни истеъфога чақирганди.
Желязков ҳукумати аввал бешта ишончсизлик вотумидан омон қолган ва 11 декабр куни бўлиб ўтиши керак бўлган олтинчи овоз беришдан ҳам ўтиши кутилаётган эди.
Норозиларни икки шахснинг роли янада ғазаблантирган. Булар олигарх Делян Пеэвски ва собиқ бош вазир Бойко Борисов. Маълумотларга кўра, намойиш “Истеъфо! Пеэвски ва Борисов ҳокимиятдан кетсин” шиори остида ташкил этилган.
Пеэвски АҚШ ва Буюк Британия томонидан коррупцияда айбланиб санкция остига олинган ва унинг партияси ҳукуматни қўллаб турган эди.
Борисов эса 2024 йил октябр сайловларида биринчи бўлган Желязковнинг ГЕРБ партияси етакчиларидан.
Борисов бош вазир бўлган 2020 йилда коррупцияга қарши норозиликлар унинг ҳукуматини қулатган эди ва ўшандан бери мамлакатда етти маротаба сайлов ўтказилди.
Софиядаги сиёсий беқарорликка қарамай, Болгариянинг еврога ўтиш жараёни хавф остида эмас деб ҳисобланмоқда.
Истеъфо баёнотида Желязков мамлакат катта синовларга дуч келганини, фуқаролар эса кейинги ҳукумат қандай бўлиши кераклиги бўйича ўз таклифларини бериши зарурлиги таъкидланган.
Transparency International маълумотларига кўра, Болгария Европада расмий коррупция ҳақидаги жамоатчилик тасаввури энг юқори бўлган давлатлар қаторида.
