Ўзбекистоннинг Португалияга қарши ўйини бекор қилинди
Икки терма жамоа ўртасида ўртоқлик ўйини бўлиши кутилаётганди. Аммо ЖЧ қуръасидаги рақиблик сабаб бу учрашув ўтказилмайди.
Ўзбекистон ЖЧ қуръаси сабаб Португалия билан ўртоқлик ўйинини бекор қилди.
Ўзбекистон миллий терма жамоаси Португалия билан ўйнамайди. Бу ҳақда 5 декабр куни Вашингтонда бўлиб ўтган 2026 йилги Жаҳон чемпионати гуруҳ босқичига қуръа ташлаш маросимидан сўнг эълон қилинди.
Ўзбекистон Португалия ва Колумбия билан ўйнайдиган К гуруҳига киритилди. Гуруҳдаги тўртинчи жамоа қитъалараро плей-оффдан кейин аниқланади.
Championat.asia нашри маълумотларига кўра, Ўзбекистон футбол ассоциацияси илгари Португалия футбол федерацияси билан март ойида ўртоқлик ўйини ўтказишга келишиб олган эди.
Бироқ, жамоаларни бир гуруҳга жойлаштирган қуръа ушбу ўйинни бекор қилишга мажбур қилди. Энди Ўзбекистон ҳам, Португалия ҳам март ойида бўлиб ўтадиган ФИФА кунлари учун янги рақиблар топиши керак бўлади.
Эслатиб ўтамиз, 40 ёшли Криштиану Роналду Португалия терма жамоасининг асосий ўйинчиси ҳисобланади.