Исломбек Исмоилов “Нефтчи” клуби бош мураббийи бўлди
Яқиндагина жаҳон чемпионатида шов-шув кўтарган мутахассис фаолиятини Фарғонада давом эттиради.
Ўзбекистон У-17 терма жамоасини Осиё чемпиони қилган ва жаҳон чемпионати нимчорак финалига олиб чиққан мураббий – Исломбек Исмоилов “Нефтчи” жамоаси янги бош мураббийи этиб тайинланди.
Марғилон шаҳрида туғилган Исломбек Исмоилов бошчилигида “Нефтчи” жамоаси олдига келгуси мавсумда қуйидаги асосий вазифалар қўйилди:
- чемпионликни сақлаб қолиш ва мустаҳкамлаш;
- Осиё чемпионлар лигаси элит босқичида муваффақиятли иштирок этиш;
- жамоанинг рақобатбардош ва узлуксиз ривожини таъминлаш.
Исломбек Исмоилов Фарғонада аввал “Қўқон-1912” футбол клубини ҳам бошқарган.
Водий жамоаларида кечадан бери шов-шувли тайинловлар кузатиляпти. Тимур Кападзе Наманганга йўл олган бўлса, Самвел Бабаян Андижонда ишлайди.