Октябрда иккиламчи уй-жой бозорида нархлар қимматлади

Иқтисодий тадқиқотлар ва ислоҳотлар маркази октябр ойидаги Ўзбекистон уй-жой бозори динамикаси маълумотларини тақдим этди.

Октябр ойида уй-жой бозоридаги фаоллик ўсиши республиканинг барча ҳудудларида қайд этилди.

Энг катта ойлик ўсиш Хоразм, Бухоро ва Тошкент вилоятларида кузатилиб, бу ҳудудларда уй-жой олди-сотди битимлари ўртача 26 фоизга кўпайди. Сурхондарё ва Сирдарё вилоятларида эса ўсиш мӯътадил бўлиб, мос равишда тахминан 2% ва 4% ни ташкил этди.

Республика бўйича уй-жой олди-сотди битимларининг тахминан 30 %и Тошкент шаҳри ҳиссасига тўғри келади. Октябр ойида пойтахтда савдо ҳажми ойлик ҳисобда 5,3 %га, йиллик ҳисобда эса 32 %га ошди.

Октябрь ойида иккиламчи уй-жой бозоридаги нархлар динамикаси бироз тезлашди. Бир ой ичида 1 квадрат метр учун ўртача нарх 2,4% га ошди, сентябрда бу кўрсаткич 0,6% бўлган эди.

Ўтган йил октябрига нисбатан ҳисоблаганда, иккиламчи бозорда ўртача нарх 1 кв. метр учун 7,4% га ўсган.

Энг юқори ўсиш суръатлари Сурхондарё ва Наманган вилоятларида қайд этилди, бу ҳудудларда уй-жой нархлари тахминан 20% га ошди.

Октябр ойида Тошкентда иккиламчи уй-жой бозорида нархлар деярли ўзгармасдан қолди, ўртача ўсиш 0,7% атрофида бўлди.

Йиллик ҳисобда, ўтган йил октябр ойига нисбатан, пойтахтда иккиламчи уй-жой нархлари 1% га пасайган. Энг сезиларли тушиш Мирзо Улуғбек ва Яшнобод туманларида қайд этилган, бу ерда ўртача нархлар тахминан 5% га арзонлашган.

Пойтахтнинг бирламчи уй-жой бозорида эса аксинча, нархлар ўсиши кузатилмоқда. Октябрь ойида бир квадрат метр учун ўртача нарх йиллик ҳисобда 2,1%га ошган.

Энг юқори ўсиш Бектемир, Яшнобод, Миробод ва Яккасарой туманларида қайд этилган бўлиб, бу ҳудудларда нархлар ўртача 5,5% га ўсган.