Британиялик сиёсатчи: "Путин жуда ёмон одам"
"Reform UK" партияси етакчиси Найжел Фараж 10 йил аввал Россия президенти ҳақида илиқ фикрлар билдирганди. Фараж НАТО ҳудудига кирган рус самолётлари уриб туширилиши кераклигини ҳам айтди.
Буюк Британиянинг "Reform UK" партияси етакчиси Найжел Фараж Россия президенти Владимир Путин ҳақида кескин гапирди. У Путинга “сиёсий фаол сифатида ҳурмат қиламан, аммо инсон сифатида эмас,” деди.
Найжел Фараж Россия борасида “юмшоқлик қилмоқда” деган айбловлардан сўнг Владимир Путинни “жуда ёмон одам” деб атади.
Фараж, шунингдек, НАТО ҳаво ҳудудига кирган Россия самолётларини уриб тушириш ва музлатилган Россия активларини Украинага ёрдам учун ишлатишни қўллаб-қувватлашини билдирди.
Бироқ Фаражнинг рақиблари илгари у Россия президентини мақтов билан тилга олганини эслатиб, уни Москвага нисбатан юмшоқ муносабатда бўлаётган деб кўрсатишга уринмоқда.
Аммо 16 октябр куни у Bloombergнинг The Mishal Husain Show дастурида чиқиш қилиб, ўз позициясини янада кескинлаштирди. "Аниқки, Путин ақлан соғлом, мантиқан ҳаракат қиладиган одам эмас. Менга "сен Россияга юмшоқ муносабатдасиз" дейиш — бу мутлақо бемаънилик", деди у. Фараж шунингдек, қўшимча қилди:
“Шубҳасиз, Путин жуда ёмон одам. Мен аслида Трамп Путинни жиловлай олади, улар қандайдир келишувга эришади деб умид қилган эдим — худди яқинда Ғазо ва Исроил ўртасида бўлгани каби. Аммо энди бундай бўлмаслиги аён бўлди.”
Ўн йил олдин, ундан “Сиз энг кўп қойил қолган жаҳон етакчиси ким?” деб сўрашганда, Фараж шундай жавоб берган эди: “Агар сиёсий фаол сифатида баҳолайдиган бўлсам — инсон сифатида эмас — мен Путинни айтган бўлардим. У Сурия масаласини қандай бошқаргани — зўр эди. Лекин бу, мен унинг сиёсатини ёқлайман, дегани эмас. Ҳозир неча нафар журналист қамоқда ўтирибди?”
Партияси етакчиси 2014 йилда GQ журнали чоп этган бу сўзлари йиллар ўтиб яна тилга олинаётганидан норози эканини бир неча бор билдирган, у ўша пайтда “менинг гапларим нотўғри талқин қилинган”, дея изоҳ берган.
Пайшанба кунги интервьюда агар Россия самолётлари иттифоқдош давлатлар ҳудудидан ўтса уларни уриб тушириш керак дея фикр билдирди. Сиёсатчи, шунингдек, музлатилган Россия активлари “агар улар ноқонуний йўл билан олинган бўлса”, Украинага кредитлар бериш учун ишлатилиши кераклигини айтди.
Бундан ташқари, агар у бош вазир бўлса ва тарафлар ўртасида тинчлик бўлса, БМТ тинчликпарвар кучи таркибида Британия қўшинлари Украинада бўлишини қўллаб-қувватлаши мумкинлигини қўшимча қилди.